Akulu kiñe we püñeñ, tati we chaw ka ñuke engu müna ayüwi ñi piwke, welu niey doy küdaw. Rume (mütre) afmatukeymu chi tunten (chumten) antü ka küdaw niey ñi dapiafiel tami we püñeñ. Küme ürkütunolmu ka tüngkülenolmu tamu rakiduam, fey küme yewlayafuymu. Feymew trür (trir tripa) müley tamu adkünual tati chemkün, femngechi dapiafiel ti we püñeñ ka kuñiwtukual tamu kurewen-ngen. ¿Chumngechi tati kümeke ngülam mülelu Biblia mew, kelluafuymu tamu norümal tüfachi welulkawün mu?

BIBLIA TAÑI FEYPILEN: “Fey tati nielu piwkeyechen, niey ngenoafeluwün ka küme piwkengey [...], ka chekawünngelay rume [‘iñche müten’ pilay], lladküfemkelay” (1 Korintio 13:4, 5). Kiñe we ñuke doyelniefi (doyemni) ñi we püñeñ ñi dapiafiel. Welu tami füta trokiwkinolpe ñi kiñepülekünungen, feymew tukulpange tami füta ka duamtuniey ñi allkütungeal. Feymew pengelafimi tami piwkeyefiel ka ñom piwke mu, tunte (chumten) falintuniefimi ka duamniefimi tami füta ñi kellun ñi dapiafiel ti we püñeñ.

‘Küme kimün mew, eymün, pu füta, amulepe tami müleal tamün kure engün’ (1 Pedro 3:7, Traducción del Nuevo Mundo, TNM.) Eymi we chawngelmi, rakiduamnge fewla tami domo doyelchi ngüneduamnieafi (doyemni) ñi püñeñ, feymew tami domo afeluwafuy chi, yafülngewelayafuy kam weñangküleafuy rume ñi we küme küdawün nielu. Feymew kiñeke rupa lladküle eymi mu, welu tüngkülenge, “tati lladküfemkenolu, doy kümengey kiñe newen-ngechi wentru” (Proverbios 16:32). Küme ngüneduamnge ka elufinge ñi duamnieel tami domo (Proverbios 14:29).

TAMI FEMAFEL:

• Eymi chawngelmi: Kellufinge tami domo tamu dapiafiel tamu we püñeñ, pun kütu (kenü trafia püle). Feymew doyenielafimi kakelu küdaw tami nieel, femngechi doy müleaymi tami domo engu ka tami yall.

• Eymi ñukengelmi: Tami füta ayüle tami kellual tamu dapial tati we püñeñ, llowmafinge ñi kellun. Küme femkenole, ngelay tami weda lladkütudunguafiel, piwkeyen mu kimeltufinge chumngechi müley ñi adümal

BIBLIA TAÑI FEYPILEN: “Fey mür kiñe che reke müten ñi feleael” (Génesis 2:24). Fewla tamu reñma niey kiñe we poyen che, welu ngoymakilnge (moymalkilnge) eymi ka tami kompañ “fey mür kiñe che reke müten”. Müley tamu newentuleal ñi ngañwadnoal (ngankonoal) tamu kurewen-ngen.

Ti domo, mañumtufinge tami füta ñi kellun. Mañumtufilmi kümeke dungu mew, tüfa “kiñe tremoltun (mongeltun)” reke ngeafuy (Proverbios 12:18). Ti füta feypifinge tami domo tunten (chumten) tami piwkeyefiel, ka falintufiel kom ñi femkeel ñi reñma mu (Proverbios 31:10, 28).

“Ngelay ñi kintungeael ta kiñe che müten ñi kümelkaleael, welu may tañi kümelkaleael ta kakelu kay” (1 Korintio 10:24.) Rumel (molkechi) femnge ñi kümelkaleal tami kompañ ka ngüneduamnge kom ñi femkeel. Müley tamu nütramkawal ka welukentu allkütual. Ka mülelay eymi mu müten rakiduamal ti kudumuwün dungu mu. Müley tami ngüneduamal chem ñi duamnieel tami kompañ. Biblia feypi: “Welukentu ngünewlaymu, trür [trir tripa] kiñewküleal kiñe rakiduam mu” (1 Korintio 7:3-5, TNM). Femngechi rüf dungu mew tamu nütramkayal tüfachi dungu mu. Doy yafültukuay tamu kurewen nielmu ñom piwke ka küme allkütukeel.

TAMI FEMAFEL:

• Ngoymakilnge (moymalkilnge), müley tami elkünual antü tami müleal tami kompañ engu

• Ka pengel-luwaymu pichiken dungu mu tamu piwkeyewün, kiñe karta kam kiñe yewün mu

BIBLIA TAÑI FEYPILEN: “Pichiwentrungelu müten ta eymi kimniefimi tati Wirin Chillka ñi küme dungu, fey ta adümelaeymew tami kimchengeael ka eluaeymew tami montuluwael” (2 Timotew 3:15). Pepikawaymi chumngechi tami kimeltual tami yall. Ngüneduamaymi petu ñi choyüngenon (llegnon) tami we püñeñ pepikawküley ñi kimal, tüfa afmatufalngey. Rakiduamnge tüfa, tami küdiñ (angka) mew mülelu pepi allkütuy tami dungun ka kimi tami pürapapiwken. Choyüngelu (lleglu) müten wimtumafimi (wenulkafinge) ñi chillkatual kimnole rume, femngechi kelluafimi tami püñeñ tremle ayüafuy ñi chillkatual.

Rakiduamkilnge tami we püñeñ petu rume pichikay tami nütramkayafiel Ngünechen mu. Feymew kidu ñi adkiñ mew, müley tami ngillatuafiel ta Ngünechen (Deuteronomio 11:19). Trür (trir tripa) awkantulmu, dungufinge kom Ngünechen ñi dewman (Salmo 78:3, 4). Amulele ñi tremkülen, tami püñeñ ngüneduamay tunte (chumten) eymi piwkeyefimi ta Jewba, feymew ka kimay ñi piwkeyeafiel.

TAMI FEMAFEL:

• Ngillatufinge ta Ngünechen tami eluaetew kimün tami kimeltuafiel tami yall (püñeñ)

• Wiño feypimekefinge ti falin-ngechi kimün dungu, femngechi tami we püñeñ pürüm (pür) kimay