MÜLEI fentrequen cristiano fiestañmaquenofilu tati Navidad. ¿Ayüucülei ñi femün mu engün? Tañi celebranofiel mu ti Navidad, ¿quiñeque dungu nienolu troquiuqueingün? Tañi pu yall, ¿müntuñmangelu cümeque dungu troquiuqueingün tañi celebranofiel mu ti Navidad? Peaiñ chem pi quiñeque Dunguquelu Ineingen Jehová fill lof mapu mu mülelu.

Feula doi cüme acordaquefingün ta Jesús. Quiñe domo Eve pingelu, Australia mapu mülelu feipi: “Petu testigongenolu iñche, amuquelafun ta iglesia mu. Amuquefun Navidad mu ca Pascua de Resurreccion mu müten, huelu rumel no, quiñeque mu müten. Amuquefun, huelu rüf duamtuquelafuiñ ta Jesús. Feula celebraquelafiñ tati Navidad, huelu semana mu epu rupa amuquen trahun mu ca quimeltulelquefiñ ta che chem ñi femün ta Jesús. Feulaque ta rüf acordaquefiñ ta Jesús”.

Doi ayühun-ngei tañi hulal ta yehun (regalo). Quiñe hueche huentru Reuben pingelu Irlanda del Norte mülelu feipi: “Rume ayühuelqueneu tañi elungeyüm ta yehun tañi üngümnienofel. Ayüquen ñi deumayal tarjeta ca adentun ñi eluafiel caquelu, femngechi ayüuqueingün, iñche ca ayüuquen”.

Doi cüme quellungei tati pu duamnielu. Emily, Australia tuuchi domo feipi: “Ayühuelqueiñmu taiñ pepicalelafiel iyael tati pu cutrancülelu. Quiñeque mu, ca yelelquefiyiñ iyael ca pichique yehun tañi doi cüme duamcüleal. Feichi dungu femngeafui chem antü rume”.

Doi trahuluucülequei pu familia. Quiñe domo Wendy pingelu mülelu Islas Caimán feipi: “Trahuluuyüm pu familia, tati pu pichiqueche doi quimafui tañi cucu, malle, lacu ca caquelu pariente. Trahuluuquelaiñ taiñ fiestayal müten, doi mai trahuluuqueiñ taiñ piuqueyehun mu taiñ pu familiahuen-ngen”.

Cüme yeniehui caquelu che engün. Sandra tuulu España mapu feipi: “Fentren duam nien Navidad mu, ngelai tiempo ñi raquiduamal chumngechi ñi cüme yeucüleal caquelu engün. Huelu feula quimnielu Biblia ñi quimeltun, quimnien tañi pu püñeñ nieai doi cüme mongen, feimu doi tüngcülen”.