“Perdonaen” feipiliyiñ, quelluaiñmu taiñ cümelcautual

QUIÑE quim domo Deborah Tannen pingelu, feipi fentren cümeque dungu tripaquei eluuliyiñ taiñ huiñoduamtuen pial. Cümelcautuafui epu che fei ñi quehuanon, ca cümelcautuafui epu paises fei ñi hueichanon. Tüfachi domo ca feipi: “Quiñe gobierno cutrancafile tati pu che, huelu perdonamuchi pifile, fei pengelai huesa duameleteu ñi cutrancafiel engün”. Cafei huiñoduamtuen piliyiñ, cümelcautuafuiñ taiñ pu hueni engün.

Biblia ca femngechi feipilei ñom piuque mu huiñoduamtuen piliyiñ, cümelcautuafuiñ caquelu che engün. Jesús entui quiñe nütram. Quiñe hueche huentru huedhuedcahui fei com apümtucui tañi herencia. Checontulu, huiñotui tañi chau ñi ruca mu, fei perdonaen pifi, fei tati chau ayühunquechi lloutueyu (Lucas 15:17-24). Rüfcünu, mülei taiñ ñom piuquengeal taiñ huiñoduamtuen piafiel caquelu che, femngechi cümelcautual.

Perdonaen piliyiñ, ¿chumngechi cümelcayafeiñmu?

Ti domo Abigaíl tripalu Biblia mu, ñom piuquengefui ca eluucülefui ñi perdonaen pial. David ca tañi pu huentru cuñiutuculelfi ñi pu ufisa ta Nabal, Abigaíl ñi huentru ürque. Huelu quiñe nag, David tañi pu hueni ngillatumefilu iyael ta Nabal, quisu turpu pilai ñi eluafiel, doi mai huesa pifi ca quechafi. David rume illcui, feimu trahulfi 400 huentru ñi langümmeafiel ta Nabal ca com tañi ruca. Abigaíl quimlu ñi femün tañi füta ca ñi fente illculen ta David, pepicahui ñi trafmeafiel. Puulu cheu ñi mülen David, lucutunagi ca feipifi: “Tañi ñidol, iñche culpatuen. Llellipueyu, eluen tañi dungual. Allcütuaimi chem ñi feipin tami cüdaufe”. Feimu müten Abigaíl tüngduamelfi ñi piuque ta David ca elufi iyael. Fei David feipieyu: “Amutunge tami ruca mu, huesa duamcülelayaimi. Allcütueyu tami feipiel ca feman tami ngillatupeel” (1 Samuel 25:2-35).

Abigaíl ñom piuquengelu ca perdonaen pilu, montulfi fentren che. David ca mañumeyu quisu ñi duam mu ñi langümnofiel culpanochi che. Abigaíl culpalafui, huelu quisu culpantucuhui ñi tüngduamelafiel ta David.

Apostol Pablo ca femngechi eluucülefui ñi perdonaen pial. Quiñe rupa incañpehui ti Sanedrín mu. Ti hunen sacerdote Ananías fente illculu ñi feipieteu apostol Pablo, huercüi quiñeque huentru ñi cultraftucuafiel ñi hun ta Pablo. Feimu Pablo feipifi: “Cüme piuquefaluuqueimi. Eimi ta cultraftucuaimu Chau Ngünechen. Anücünuhuimi tami juiciantucuafiel ta iñche, chumngechi feipi Moisés ñi ley. Huelu feipimi ñi cultraftucungeal ta iñche, femngechi quiñepülecünufimi ti ley”. Pu allcütulelu feipieyu ñi huesa pimequefiel tati hunen lonco sacerdote, femngechi Pablo inaduamuhui ñi huesa entun ñi hun. Feimu feipi: “Pu peñi, ¿ti hunen lonco sacerdote ama? Iñche quimlafun. Chau Ngünechen ñi huirintucuel feipilei: ‘Inei rume loncolele tami pu che meu, illamcadungulayafimi’” (Hechos 23:1-5).

Rüfngefui ñi feipin Pablo, ngelafui ñi hulelngeal quiñe che petu juzgangelu. Femfui rume, Pablo perdonamuan pi tañi huesa pifiel tati hunen lonco sacerdote. a Ñi rupan tüfachi dungu, pu che Sanedrín mu pepi allcütufingün Pablo. Pablo quimnielu com ti pu che mülelu Sanedrín mu feyentuquelafui ñi huiñomongetual che, feimu allmalltui feichi dungu ñi nütramelafiel. Feimu ti pu che mülelu Sanedrín mu, chaftudunguhuingün, fei ti pu fariseo incafingün Pablo (Hechos 23:6-10).

¿Chem quimeltueiñmu ñi femün Abigaíl ca Pablo? Mür engu perdonaen pingu, femngechi caquelu che cüpa allcütueyu. Ca femngechi iñchiñ perdonaen piliyiñ, cüme yeucüleaiñ caquelu che iñchiñ. Huesa entun mu taiñ hun perdonaen piliyiñ, fei cümelcautuaiñ.

Iñche huesa femlan piliyiñ cai, ¿chumaiñ?

Quiñe che illcule ca huesa duamle iñchiñ taiñ feipin cam taiñ femün mu, raquiduamafuiñ ñi cüme raquiduamquenon ca illcufe chengei. Huelu acordayaiñ chem ngüfetufi Jesús tañi pu discipulo: “Feimu llemai, yelmi tami mañumtun cheu ñi chalintucungequen, fei acordarumelmi illcutunieimu tami peñi, feimeu müten elcünunge tami mañumtun, amunge. Hune cümelcautunge tami peñi eimu. Fei hula huiñotunge tami hulal ti mañumtun” (Mateo 5:23, 24).

Quiñe dungu: quiñe peñi raquiduamle taiñ rume huesa femfiel, ngüneduamaiñ chem ñi feipin Jesús. Fei cümelcautuayu taiñ peñi engu, raquiduamliyiñ rume taiñ huesalcanofiel. Griego quehun mu, cüpa feipi ‘epu che illcutunieule, mür mülei ñi eluhual ñi cümelcautual’ (Diccionario expositivo de palabras del Antiguo y del Nuevo Testamento exhaustivo, de W. E. Vine). Felei, epu che illcutunieule mür pichi huesalcapelaingu, culpan chengelu ca huelulcauqueingu. Feimu epu che mülei ñi feipihual tañi huesa femün.

Müte raquiduamlayaiñ inei ñi culpan, doi mai inei ñi hunelu feipial huiñoduamtuen. Pablo quimlu ñi pu peñi Corinto mu mülelu juiciantucumequehuingün pichiquen dungu mu, norümtufi ca feipifi: “Feimu eluhuaimün tamün femngeal norngenochi dungu cam müntuñmangeal tamün nieel, ¿doi cümeafui peno?” (1 Corintios 6:7). Pablo femngechi feipifi pu peñi ñi amuhuenoal tribunal mu engün ñi quehuatumequehuenoal engün. Tüfa ta quimeltueiñmu ñi doi falin-ngen ñi cümelcaucüleal pu peñihuen ñi pengelal inei culpai. Acordaniefiliyiñ tüfachi ngülam, müte cüdautulayaiñ ñi feipiafiel quiñe peñi huiñoduamtuen raquiduamfule taiñ huesalcafiel.

Rüf piuque mu feipiaiñ huiñoduamtuen

Quiñeque che re huimtun mu müten huiñoduamtuen feipiyauquei. Japón mapu mu ti pu che huiñoduamtuen ñi pial sumimasen piqueingün. Ca sumimasen piqueingün ñi chaltu pial, femngechi pengelal ñi pepi huiñolelnoafiel ñi fürenengeel. Ti pu che huimtulelu ñi fill mu sumimasen pial, quiñeque che ramtuuquei ñi rüfngepen mai huiñoduamtuen ñi pimequeel. Ca femngechi rupaquei caquelu quehun dungu mu.

Chem quehun mu rume huiñoduamtuen piliyiñ, mülei ñi rüf piuque mu feipial. Taiñ dungun mu ca chumngechi dunguqueiñ quimfalngepe taiñ piuque mu tripamequei taiñ feipin. Jesucristo quimeltufi tañi pu inanieteu: “Feimu llemai, feman pilmün, femaimün, ca femlayan pilmün, femlayaimün. Doi amulngele ti dungu, Huecüfü mu cüpai” (Mateo 5:37). Huiñoduamtuen pilmi, rüf pengelnge. Quiñe ejemplo, aeropuerto mu quiñe huentru huiñoduamtuen pifi quiñe domo pichi tuntucufilu tañi maleta mu. Ca pichiñma mu, ca huiño tuntucufi ca feipifi huiñoduamtuen. Cülachi rupa femlu, ti huentru amulelu ti domo engu feipifi: “Rüf huesa duamülmi tami femqueel, cüme inaduamnge ñi huiño tuntucunoafiel”. Huiñoduamtuen pifiliyiñ quiñe che taiñ huesa femfiel, eluucüleaiñ ñi huiño huesalcanoafiel.

Mülei taiñ entudungual taiñ huesa femün, huiñoduamtuen pial ca cüme inaduamal ñi huiño femnoafiel, femngechi pengelaiñ taiñ rüf repentiucülen. Ca huesa femngeliyiñ, eluhuaiñ taiñ perdonayal (Mateo 18:21, 22; Marcos 11:25; Efesios 4:32; Colosenses 3:13). Taiñ culpan chengen mu, cüdautuafuiñ taiñ cümelcautual. Huelu huiñoduamtuen piliyiñ, quelluafeiñmu taiñ cümelcaleal com pu che engün.

¿Chem mu huiñoduamtuen pilayaiñ?

Quimnieiñ falin-ngen huiñoduamtuen pial, huelu quiñe quimche quimniei ñi rumel femngechi femnoal. Quiñe ejemplo, rupaliyiñ cuñihun-ngechi dungu taiñ famentuafeteu Jehová mu. Jesús miyaupalu mapu mu, “illamuhui. Tunte puulu ñi mongen, feyentufi ta Chau Dios. Felei, lalu rume orcon mamüll meu” (Filipenses 2:8). Jesús cutrancamequengelu tañi feyentulen ñi Chau mu, feipilai huiñoduamtuen ñi montulngeal. Ca huiñoduamtuen pilafi ti hunen lonco sacerdote feipielumu: “Mülei tami rüf dungual. Femnolmi, mongen Ngünechen coilatuafimi. ¿Eimi lle tati Cristo, Chau Ngünechen ñi Fotüm?”. Jesús huiñoduamtuen pilafi, doi mai llicanon mu feipifi: “Cüme feipimi tati. Huelu iñche feipihuayiñ, ti Huentru ñi Fotüm anüleai tati Com Nehuen Nielu ñi man püle, ca cüpayai huente tromü meu. Eimün peafimün cüpalechi antü mu” (Mateo 26:63, 64). Jesús doi falintui ñi nor piuqueyeafiel ñi Chau ñi cümelcaucüleal ti hunen lonco sacerdote engu.

Com pu cristiano yamniequefi pu che nielu autoridad, huelu huiñoduamtuen piquelaingün ñi piuqueyefiel ta Jehová ca tañi pu peñi ca lamngen (Mateo 28:19, 20; Romanos 13:5-7).

Pichiñma mu chem no rume catrütulayai taiñ tüngcüleal

Famülque mu, com huelulcauqueiñ culpan chengelu iñchiñ Adán ñi duam mu (Romanos 5:12; 1 Juan 1:10). Adán culpan chengerpui feyentunofilu tañi Deumaeteu. Huelu Chau Dios deumafilu pu che, ayülafui ñi culpan chengeal engün. Feimu feipicünui ñi apümafiel ti culpan dungu ca ti hulquelu ti culpan (1 Corintios 15:56, 57).

Raquiduamnge chumletuaiñ ngehuenole ta culpan. Santiago, Jesús tañi peñi, ngülamtufi pu che ñi cuñiutucuhual tañi quehun mu. Feipi: “Feiti turpu huelulcaquenolu tañi dungun meu, culpan chengelai, fei pepicaucülei ñi ngünenieafiel com tañi cuerpo” (Santiago 3:2). Feiti che culpan chengenolu cüme ngünenieafi tañi dungun, feipilayai chem huesa dungu no rume, duamfalngelayai feipial huiñoduamtuen. Fei pepicaucüleai “ñi ngünenieafiel com tañi cuerpo”. Culpan chengehuenoliyiñ, com cümelcaletuaiñ. Chem no rume catrütulayai ñi cümelcautual pu che. Huelu famülque mu huesa dungu femliyiñ, rüf piuque mu huiñoduamtuen piaiñ. Femngechi cümelcaleaiñ ca tüngcüleaiñ.

[Quimngeal dungu]

[Adentun]

¿Chem quimeltueiñmu Pablo ñi femün?

[Adentun]

Culpan chengehuenole che, chem no rume catrütulayai ñi tüngcüleal