¿Inei pingei ta Chau Ngünechen? Jehová pingei. Quisu feipi: “Iñche ta Jehová. Tüfa tañi üi” (Isaías 42:8). Biblia meu, Chau Dios ñi üi mülei epe 7.000 rupan. Huelu alün che rulpadungufilu chi Biblia entuñmaquefi Chau Ngünechen ñi üi, fei huelutucuquefingün ti üitun “Señor” cam “Ñidol” mu. Müna huesa ñi femün engün, ¿chumngelu? Chau Dios cüpa hueniyeiñmu, feimu ayüniei taiñ quimafiel quisu ñi üi mu, fei taiñ üituafiel (Salmo 105:1).

Jehová, ¿ca chumngechi üitungequei? Fillque üi tuculelngequei Biblia mu: Chau Ngünechen, Com Nehuen Nielu, Deumafe, Huenu Chau ca Ñidol. Fentren che tripalu Biblia mu femngechi üitun feipifingün ta Chau Dios ngillatun mu, huelu cafei Jehová pifingün (Daniel 9:4).

 ¿Chumngei ta Chau Ngünechen? Quisu ta quiñe püllü. Feimu Biblia feipi inei no rume ta pequelaeyu (Juan 1:18). Biblia ca pengeli chum duamcülequei Jehová. Feipi pu che ta hueñancülafeyu cam ayühuelafeyu tañi femqueel meu (Salmo 78:40, 41; Proverbios 11:20).

Afmatufali ñi chumngen ta Jehová. Quisu dullintuchequelai, chuchi tuhunchengeafui rume, com cüme llouquefi (Hecho 10:34, 35). Cafei Jehová ‘cutranpiuqueyechequei, cuñillchequei, illcufemquelai, rume piuqueyechequei ca com tañi feipin rüfngei’ (Éxodo 34:6, 7). Chau Dios tañi cüme chumngen meu, doicülei tañi nehuen-ngen, tañi quimün-ngen, ñi norngen ca tañi piuqueyechefengen. Ngüneduamaiñ caque quiñeque.

Nehuen-ngei. Chau Dios com nehuen niei ñi femürpual tañi feipicünuel, feimu Biblia üitueyu tati “Com Nehuen Nielu” (Génesis 17:1).

Quimün-ngei. Chau Ngünechen doi quimün niei ta inei meu rume. Feimu Biblia feipi quisu “müten com quimün niei” (Romanos 16:27).

Norngei. Taiñ Fütra Chau rumel femquei nor dungu, “huelulcauquelai com tañi femquen mu” ca “turpu femquelai norngenochi dungu” (Deuteronomio 32:4).

Piuqueyechefengei. Chau Ngünechen mu tuhui ti piuqueyen (1 Juan 4:8). Chau Dios doi inayentufali chumngechi tañi piuqueyefiel ta che, inei rume chaflaeyu. Quisu fütra piuqueyen mu femquei com cümeque dungu, tüfa müna cümelcaqueiñmu.

Chau Dios cüpa hueniyeiñmu. Quisu taiñ poyen Chau (Mateo 6:9). Huelu fei ca müten no, maneluuliyiñ quisu meu, fei hueniyeafeiñmu (Salmo 25:14). Quisu piuqueyenquechi mangelqueiñmu taiñ ngillatuafiel fei taiñ fülconal quisu meu. Biblia feipieiñmu: “Chau Ngünechen duamtunieimünmeu. Fei tañi cuhu mu elcünuafimün com tamün fill raquiduamelnieteu” (1 Pedro 5:7; Santiago 4:8).

Jesús ta Chau Dios no. ¿Chumngelu? Jesús deumaeyu ta Chau Jehová, feimu doicülelai quisu mu. Jesús tuhui ta Chau Ngünechen mu, feimu Ngünechen tañi Fotüm feipingei Biblia mu (1 Juan 4:9). Felei, Jehová deumafi ta Jesús, fei hula mür cüdahuingu ñi deumayal itrofill mülelu (Colosenses 1:15, 16).

 Jesús turpu feipiquelai “iñche ta Chau Dios”. Doi mai feipi ñi quimniefiel tañi Chau, “quisu ta huercüeneu” pi Jesús (Juan 7:29). Fei quimfalcünulelfi tañi pu discipulo ñi chauyefiel ca ñi poyequefiel ta Jehová, ca feipifalfi engün: “Tañi Chau, eimün tamün Chau cafei. [...] Tañi Ngünechen, eimün tamün Ngünechen cafei” (Juan 20:17). Lalu Jesús, Jehová huiñomongeltueyu ñi müleputual huenu mu, ca elueyu autoridad üyeu (Mateo 28:18; Hecho 2:32, 33).

Jesús ñi duam mu fülconafuimi Chau Dios mu

Jesús quimeltuchepai tañi Chau mu. Tüfa ñi feipin Jehová Jesús mu: “Tüfa iñche tañi poyen Fotüm. Allcütufimün” (Marcos 9:7). Cafei Jesús fente cüme quimniefi tañi Chau, feimu feipi: “Fütra Chau müten cüme quimniefi tañi Fotüm. Cafei, ti Fotüm müten cüme quimniefi tañi Chau. Ca ti Fotüm cüpa quimeltule ñi rüf ineingen tañi Chau, fei pu che quimafui” (Lucas 10:22).

Jesús fente cüme inayentufi ñi chumngen ta Chau Dios. Feimu feipi: “Tuchi ñi peeteu iñche ca femngechi pefi tañi Fütra Chau” (Juan 14:9). Jesús inayentufi tañi Chau ñi piuqueyechen, feimu cuñillfi pu che ca cüme dungufi itrocom engün. Fei pu che inaduamlu ñi chumngen ta Jesús, doi cüme quimürpui Chau Dios ñi chumngen. Jesús feipi: “Iñche tati rüpü, ti rüfngelu ca tati mongen. Iñche meu müten pu che puhuafui tati Fütra Chau mu” (Juan 14:6). Jesús ca feipi: “Pu rüf poyequefilu ta Chau Ngünechen püramyeafingün rüf dungu meu ca chumngechi ñi adcünueteu Chau Ngünechen tañi nehuen. Fütra Chau quintuquefi feichi che ñi püramyeaeteu” (Juan 4:23). ¿Ngüneduamimi? Chau Dios quintumequei pu che cüpa quimlu ti rüf dungu quisu mu. Eimi, ¿quintuniepelaeimu Chau Ngünechen?