Püchü wentru ngelu duamkebün billke anümka ka billke kulliñ, tañi familia engu trekakebüiñ mawida, lemün ka labken inabülkülelu tañi waria Jyväskylä pingelu, Finlandia mapu mu. Weche wentru ngelu mabülkebün ti püchüke ñaiki ka püchüke trewa ñi pekeel. Doi tremlu weñangküenu ti dungu wedalmakelu tati pu kulliñ, beimu am konbün kiñe trawün ingkakebilu tati pu kulliñ. Beichi trawün mu kimün billke che rakiduamkelu iñche reke.

Küdawkebüiñ billke dungu tañi ingkaabel pu kulliñ, ka elukebüiñ billke papil tañi kaiñeltuabel tati pu laboratorio ka chew küdawngekeel ti trülke. Bemngechi am kaiñeltukebüiñ ti dungu ka we entuiñ kiñe trawün ingkakebilu taiñ pu kulliñ. Taiñ dungu ñi ingkakebel kiñeke mu weichabi pu autoridad. Beimu am carceltukungekebüiñ ka juzgangekebüiñ bill upa.

Kabei duamtukebün tati billke wedake dungu upamekelu tati pu che, beimu konün Amnistía Internacional ka Greenpeace mu tañi küdawal kom tañi newen mu ka küdawlekebün tati pu che pekenolu ta plata ka pekenolu ta yagel.

Amulelu tañi küdawmeken, kimtukun tati pu che kaletulaabüi. Wewkiiñ trukukebün kiñeke mu, welu tati pu kulliñ ka tati pu che amulerki ti wedalngekeel. Rakiduamtukun kom tübachi dungu kiñe weda newen ñi duamtukuetu, piwün. Abeluwkenu tübachi dungu.

Pu che tañi kaletukenon abkentukenu, beimu tukulpabiñ Chaw Dio ka tañi Dungu. Kimlu ume pu dungukelu iñi ngen Jewba chemchikingün ka kimelkenu Biblia, welu küdawngi tañi kaletual. Welu bewla pepilün.

Kintun tañi Biblia ka papiltubiñ, bei we duamenu kom tañi weñangküetu. Beimu kimtukun bentrenke texto, ngülamtukelu tañi ingkaabel pu kulliñ. Proverbios 12:10 mu eipi “tati norche kuñiwtukebi tañi pu kulliñ”, kabei kimtukun pu che kutrankawkelai Chaw Jewba tañi duam mu, kutrankawki tañi mupitunobel (beyentunobel) Chaw Dio, kidu elkelai wedake dungu, kutranpiwkecheki ka kuñilcheki (Salmo 103:8-14).

Beichi antü püle pewmebiñ kiñe mangel werkün kiñe correo tañi nieabel ti libru ¿Qué enseña realmente la Biblia? pingelu. Upalu kiñeke antü pepaenu epu dungukelu iñi ngen Jewba, “papiltuabeyu Biblia” pienu, “mai” piwün. Kabei amukebün pu dungukelu iñi ngen Jewba tañi trawünwe ruka mu, beimu ñochikechi Biblia tañi rüb dungu boliwi tañi piwke mu.

Biblia ñi kimün mu elkünon tañi wedake wimtun, pütrem, ngollikawün, ka we adkünotun, ka kim yambiñ ti pu autoridad (Romanos 13:1). Kabei we rakiduamtukun tati ñiwal dungu mu.

Küdawtun tañi kaletual rübngechi trukuabel tati dungu ingkakebilu pu che ka pu kulliñ. Tüba pürkachi kaletulan, kaiñeltuan rakiduamkülebün, welu kimtukun Chaw Dio ñi Ngüneneel bei müten kümelkabi kom tati dungu. Beimu kom tañi newen mu küdawkülebün ñi kimelelal ta che (Mateo 6:33).

Kuibi küme ka weda trukukebiñ ta che, kaiñeltukebiñ tati wedake che, welu bewla mai Biblia tañi duam mu kakünotun tati üden dungu, duamnebiñ kom che (Mateo 5:44). Bewla duamcheken, beimu amuldungucheken Chaw Dio ñi Ngüneneel. Bemngechi pu che tüngküli, ayüwküli ka nii maneluwün, beimu ayüwülkenu.

Chaw Dio kümeltobi ka apümkaabi kom tati pu wedalmakelu ta Mapu, pu che ka pu kulliñ kutranwelaaingün, beimu maneluwken Jewba mu ka tüngkülen. Chaw Dio tañi Ngüneneel kümelkatuabi kom tati wedalmakelu ta che (Isaías 11:1-9). Tañi ingkameken ñi kimbel ka kimelabel tati pu che ñi maneluwal Biblia ñi dungu bewla ayüwkülen, kaiñeltuwelan bei tüngkülen.