• Ndw 69:​30, 31—Mɩnla ɔhʋanɩ zʋ yɛ nkyɩkyɛmi eyimmɔ kɔhʋla kɔwʋwa yɛ ma yɛ mpayɩwɔlɛ kodu mpʋnɩ a? (mwbr24.07 6 ¶2)

  Wu munwalɩyɛ

• Wɔ dapɛnɩ eyi Bayɩbʋlʋ ɛɣɩngalɛ yɩ nu nɩ, mɩnla yɛ ɔnwʋnlɩ mɔɔ ɛpɛ kɛɛ ɛkã a?

  Wu munwalɩyɛ

Bɔmʋnlɩ nɩ, nɩ yɛyɛ dɩyɛzumanlɛ anwɩ̃ wɔ dapɛnɩ avinli, naasʋ̃ wɔ January 2009 nɩ, bɛhanlɩ dɩyɛzumanlɛ anwɩ̃ yɩ bɔwɔlɩ numɔ bɛyɛlɩ yɩ ɔkʋ̃. Eyi manlɩ mmusunwa nyianlɩ mmɩlɩ be wɔ dapɛnɩ bela nu mɔɔ bɛkɛva bɛkɛyɛ abusunwa ɔzʋ̃mɩnlɛ. Mmenii sʋ̃maa hile anyɩnlɩzɔlɛ ma nhyɩhyɛlɩyɛ eyi mɔɔ bɛyɛlɩ kɛɛ ɩwʋwa bɛ ma bɔhwɩ̃ beɣike Gyehova nɩɩ bɛ abusunwa.—Dit 6:​6, 7.

Mɩnla ɔhʋanɩhilelɛ yɛ ɩkɔhʋla ɩkɔwʋwa mmusunwa adile na bɛama bɛ Abusunwa Ɔzʋ̃mɩnlɛ ɩayɛ anyɩnlɩlelɛ na bɛádindianlɩ nu a?

• Kila kɛɛ bɛkɛyɛ yɩ dapɛnɩ bela. Sɛ ɩkɛyɛ bʋwɔ a, yɩ eɣile pɔkyɩɩ be siye ɛkɛnɩ mɔɔ bɛkɛva bɛkɛyɛ bɛ abusunwa ɔzʋ̃mɩnlɛ dapɛnɩ bela. Sɛ debe babɔ numɔ na bɛákʋla bɛyɛ yɩ wɔ eɣile mɔɔ bɛva beziye kɛnɩ nu a, bɛbɛ eɣile fʋlɔ wɔ ɔzɔ dapɛnɩ yi nu na bɛva bɛyɛ

• Siyeziye wʋ nwʋ. Ɛ nɩɩ wʋ yɩ zunzu mɔɔ bɛkɛva bɛkɛyɛ abusunwa ɔzʋ̃mɩnlɛ nɩ nwʋ, na ɩyɛ sʋ̃ a, de wʋ nnwuakula yɩ bɛ adwɩnɩhilelɛ. Sɛ wʋ abusunwa nɩ ta fa debe pɔkyɩɩ be dɩkɛɛ bɔ nwʋ mɔɔ bekeziyeziye bɛkɛma dɩyɛzumanlɛ, vidiyo be mɔɔ bekehila wɔ jw.org anzɛnyɩɩ jw library zʋ, nɩɩ bɔ nwʋ mɔɔ bekeziyeziye bɛkɛma mɔɔ yɛkɔhʋla yɛkɛhã wɔ dasɩlɛlilɛ nu nɩ yɛ́ abusunwa ɔzʋ̃mɩnlɛ na bɛ anyɩ deli nwʋmɔ a, mɛyɩ, ɔnwʋmɔ iáhyinyia kɛɛ ɛkɛva mmɩlɩ sʋ̃maa ekeziyeziye wʋ nwʋ

• Ma abusunwa ɔzʋ̃mɩnlɛ yɩ valɩ wʋ abusunwa yɩ bɛ ahyinyiadɩ nwʋ. Mmɩlɩ mɔɔ nnwuakula yɩ benyii nɩ, nɩ mɔɔ bɔkʋla bɛyɛ nɩɩ bɛ ahyinyiadɩ ɩsɩnzaa. Ɩsɛ kɛɛ wʋ abusunwa ɔzʋ̃mɩnlɛ nhyɩhyɛlɩyɛ nɩ bʋwa abusunwa yɩ nu enii bela ma inyi wɔ sunzuma ɔfʋã nu

• Ma ɩyɛ anyɩnlɩlelɛ na bɛ ahʋnlɩnɩ ɩdɔ bo kunlu. Sɛ oyumi bʋwabɩlɛ dɩ baaba a, ɩyɛ a, bevinde. Mmɩlɩ mɔ bogua zʋ bɛyɛɛ nɩ, sɛ ɔnwʋmɔ ba hyinyia a, ɩyɛ a, bele bɔ mʋnlɩ ɛgyɩkɩ̃ɩ̃. Ɩwɔ numɔ kɛɛ sa bɔkʋla bɛfa bɛ abusunwa ɔzʋ̃mɩnlɛ yɩ bedi bɛ abusunwa yɩ ahyinyiadɩ pɔkyɩɩ be nwʋ egyima dɩyɛ, naasʋ̃ ɩ́dɩ mmɩlɩ mɔ bɛfa botwi abiye yɩ anyunu anzɛnyɩɩ bɛfa bɛtɩnɣɛ abiye

• Ɩyɛ a, sɩnza nninyeni mɔɔ bɛfa bɛyɛ nɩ nu. Kɛ ndianwʋ nɩ, sa bɔkʋla bɛfa bɛ abusunwa ɔzʋ̃mɩnlɛ yɩ ɔfʋã be besiyeziye bɔ nwʋ bɛma dɩyɛzumanlɛ, bekila vidiyo wɔ jw.org anzɛnyɩɩ jw library zʋ na bozunzu nwʋmɔ. Na sa bɔkʋla sʋ̃ besiyeziye bɔ nwʋ bɛma mɔɔ bɛkɛhã wɔ dasɩlɛlilɛ nu. Ɩwɔ numɔ kɛɛ ɩsɛ kɛɛ bɛta bozunzu ndwokɔ nwʋ wɔ Abusunwa Ɔzʋ̃mɩnlɛ tʋ dɩyɛ, naasʋ̃ sa bɔkʋla bɛma abusunwa yɩ nu enii bela fa mmɩlɩ yɩ be yɛ yɩzayɩ yɩ dɩyɛzumanlɛ.

Bozunzu odwokɔɣizialɛ eyi nwʋ:

• Mɩnla ɔhʋanɩ zʋ yɛ ɔwɔ mmɔdɩnɩ kɛɛ ɛkɛva ɔhʋanɩhilelɛ eyimmɔ ekeli egyima wɔ wʋ abusunwa ɔzʋ̃mɩnlɛ nu a?

  Wu munwalɩyɛ