Sɛ ɩyɛ a, mmenii bɛsɩlɩ yɛ anzɛnyɩɩ bɛfa yɛ nwʋ ɛya mmɩlɩ mɔɔ yɛkãã Gyehova ɩnwʋ odwokɔ yekile bɛ nɩ. Eyi ɩkɔhʋla ɩkɛma yekeyiaki kɛɛ yɛkɛhã Nyamɩnlɩ ɩnwʋ odwokɔ. Asʋ̃ ɛdɩ nɣanlɩ ɔzɔ kyɩ̃ a?— Bayɩbʋlʋ yɩ ɩkã pavʋlɔ be mɔɔ nɩ ɩdɔ Gyehova mɔɔ ankɩ ɩyɛ ikeyiaki kɛɛ ɩkɛhã Gyehova ɩnwʋ odwokɔ ikile yɛ. Yi dima yɛ lɛ Gyɛlɩmaya. Ma yezuma ɩnwʋ dɩyɛ sʋ̃maa.

Mmɩlɩ mɔɔ nɩ Gyɛlɩmaya ɩdɩ pavʋlɔ nɩ, Gyehova ɩhanlɩ ihileli yɩ kɛɛ, ɩsɛ kɛɛ ɩbɔ mmenii nɩ kɔkɔ kɛɛ beyiakí nninyeni tanɩ mɔɔ nɩ bɛyɛɛ nɩ. Nɩ eyi ɩyɛ ɛzɩzɩbɛ baaba ɩma Gyɛlɩmaya, na ikunlu iduli. Ɩhanlɩ ihileli Gyehova kɛɛ: ‘Mízi mɔɔ ɩsɛ kɛɛ mɩkã. Mɩdɩ kuakula.’ Naasʋ̃ Gyehova ɩhanlɩ kɛɛ: ‘Máma wu kunlu itu. Sa mʋbʋwa wʋ.’

 Meti Gyɛlɩmaya ɩwɔlɩ yɩ tʋ kɛɛ ɩbɔɔ mmenii yɩ nɩ kɔkɔ kɛɛ sɛ bɛásɩnza a, sa bɔtwɩ̃ bɛ azʋ̃. Sɛ ekila a, mmenii yɩ nɩ bɛyɛlɩ mɔɔ Gyɛlɩmaya ɩhanlɩ yɩ nɩ a?— Anhã. Bɛzɩlɩlɩ yɩ na bɛvalɩ yɩ nwʋ ɛya. Nɩ ebiyemmɔ po bɛpɛyɩ kɛɛ bokũ yɩ! Ekila a, kɛ Gyɛlɩmaya ɩdɩlɩ nɣanlɩ izeli a?— Ikunlu iduli na ɩhanlɩ kɛɛ: ‘Mɩlɛ́kã Gyehova ɩnwʋ odwokɔ ebiyekʋ̃.’ Naasʋ̃, asʋ̃ iyiakili a?— Anhã, iáyiaki. Nɩ ɩdɔ Gyehova paa ma ɩzɔ ti ɩákʋla iyiaki kɛɛ ɩkɛhã ɩnwʋ odwokɔ. Na iluwakɛɛ Gyɛlɩmaya iáyiaki nɩ ti, Gyehova ɩwɔlɩ ɩnwʋ banɩ.

Kɛ ndianwʋ nɩ, mmenyia tanɩmaa be bɛhyɩlɩ Gyɛlɩmaya na bɔdʋlɩ yɩ bedianlɩ kuma holonwuu holonwuu be mɔɔ ndɛdɛlɛ ɩyɛ numɔ manlɩ nu. Nɩ íni alɩyɛ anzɛnyɩɩ nzulo bela. Nɩ ɔzɔ mmenyia yɩ nɩ bɛpɛyɩ kɛɛ betiã Gyɛlɩmaya ɛkɛnɩ ma iwu. Naasʋ̃ iluwa Gyehova yɩ mmʋwalɛ zʋ nɩ, beleli yɩ!

Mɩnla yɛ ɔkɔhʋla okozuma wɔ mɔɔ Gyɛlɩmaya ɩyɛlɩ yi nu a?— Ɩwɔ numɔ kɛɛ, ɩyɛ a nɩ yi kunlu itu dɩyɛ, naasʋ̃ iáyiaki kɛɛ ɩkɛhã Gyehova ɩnwʋ odwokɔ. Sɛ ɛkã Gyehova ɩnwʋ odwokɔ a, mmenii bɛkɛzɩlɩ wʋ anzɛnyɩɩ sa benyia wʋ nwʋ ɛya. Ebiye a, ɛkɛdɩ nɣanlɩ kɛɛ wʋ anyunu igua azɩ anzɛnyɩɩ wʋ kunlu idu po. Naasʋ̃ mɩáyiaki kɛɛ ɛkɛhã Gyehova nwʋ odwokɔ kyɩ̃. Sa ɩbʋwa wʋ eɣile bela, dɩkɛ mɔɔ ɩwʋwalɩ Gyɛlɩmaya nɩ.