1. Mɛni yi mi Mawu to ngɛ adesahi a he?

YI MI nɛ Mawu to ngɛ adesahi a he ɔ ngɛ bua jɔmi wawɛɛ nitsɛ. E bɔ kekleekle nyumu kɛ yo nɛ ji Adam kɛ Hawa nɛ e kɛ mɛ wo abɔɔ saminyayoo ko mi. Yi mi nɛ e to ngɛ a he ji kaa a fɔ, nɛ a ha zugba a tsuo nɛ pee paradeiso, nɛ a hyɛ lohwe ɔmɛ a nɔ.​​—1 Mose 1:28; 2:8, 9, 15; hyɛ Nyagbe Ningma 6.

2. (a) Kɛ wa plɛ kɛ le kaa Mawu ma tsu e yi mi tomi ɔ he ní ha kɛɛ? (b) Mɛni Baiblo ɔ de ngɛ si nɛ wa maa hi kɛ ya neneene ɔ he?

² Anɛ o susu kaa wa maa hi paradeiso mi ligbi ko lo? Yehowa de wɔ ke: “Bɔ nɛ i de ɔ, jã pɛpɛɛpɛ e maa ba mi.” (Yesaya 46:9-11; 55:11) Niinɛ, e ma tsu e yi mi tomi ɔ he ní, nɛ nɔ́ ko be e nya tsie. Yehowa tsɔɔ kaa yi mi tomi ko he je nɛ e bɔ zugba a nɛ. E “bɔɛ lɛ ngɔ fɔɛ si gu nɛ e pee yaka.” (Yesaya 45:18) E suɔ nɛ nihi nɛ a hi zugba a nɔ he fɛɛ he. Mɛni nimli kaa kikɛ nɛ Mawu suɔ kaa a hi zugba a nɔ, nɛ mɛni be e suɔ kaa a hi nɔ kɛ ya si? Baiblo ɔ de ke: ‘Nihi nɛ peeɔ nɔ́ nɛ da a [aloo a buɔ Mawu tue ɔ], zugba a maa pee a nɔ́ nɛ a maa hi nɔ daa.’​​—La 37:29; Kpojemi 21:3, 4.

3. Akɛnɛ adesahi nuu hiɔ nɛ a gboɔ he je ɔ, eko ɔ, mɛni sane nɛ o ma bi?

³ Se mwɔnɛ ɔ, nihi nuu hiɔ nɛ a gboɔ. Ngɛ hehi fuu ɔ, nihi hwuɔ ta nɛ a gbeɔ a sibi. Ngɛ anɔkuale mi ɔ, pi kikɛ ji bɔ nɛ Mawu to e yi mi kaa níhi nɛ ya nɔ. Ke jã a, lɛɛ mɛni ba? Nɛ mɛni he je nɛ e ba jã a? Baiblo ɔ pɛ nɛ ma nyɛ maa tsɔɔ nya.

4, 5. (a) Mɛnɔ kɛ Hawa tu munyu kɛ gu sinɔ ko nɔ ngɛ Eden abɔɔ ɔ mi ɔ? (b) Mɛni ma nyɛ ma ha nɛ nɔ ko nɛ e yeɔ anɔkuale ɔ ma plɛ pee julɔ?

⁴ Baiblo ɔ ha nɛ wa le kaa Mawu ngɛ he nyɛlɔ ko nɛ a tsɛɛ lɛ ke “Abosiami, loo Satan.” Satan gu sinɔ ko nɔ nɛ e kɛ Hawa tu munyu ngɛ Eden abɔɔ ɔ mi. (Kpojemi 12:9; 1 Mose 3:1) E ha nɛ e pee kaa nɔ́ nɛ sinɔ ɔ nitsɛ lɛ ngɛ munyu tue.​—Hyɛ Nyagbe Ningma 7.

⁵ Anɛ Mawu bɔ Satan Abosiami lo? Ohoo! Bɔfo ko lɛ e ba plɛ e he pee Abosiami ɔ nɛ. Benɛ Mawu dla zugba a nɔ kɛ ha Adam kɛ Hawa a, jamɛ a be ɔ mi ɔ, bɔfo nɛ ɔ ngɛ hiɔwe. (Hiob 38:4, 7) Mɛni he je nɛ e ba jã a? Mo susu he nɛ o hyɛ. Mɛni ma ha nɛ nɔ ko nɛ e yeɔ anɔkuale ɔ ma tsake kɛ pee julɔ? A fɔ we lɛ kaa julɔ. Se lɛ nitsɛ nɛ e ná nɔ́ ko nɛ tsa pi e nɔ́ ɔ he akɔnɔ, nɛ e suɔ kaa e nine nɛ su jamɛ a nɔ́ ɔ nɔ. E yaa nɔ nɛ e susuɔ jamɛ a nɔ́ ɔ he hluu, nɛ akɔnɔ yaya nɛ e ná a mi ba waa wawɛɛ. Kɛkɛ ɔ, ke e ná he blɔ ɔ, e juɔ nɔ́ ɔ. Nɔ ɔ nitsɛ nɛ e pee e he julɔ.​​—Kane Yakobo 1:13-15; hyɛ Nyagbe Ningma 8.

6. Mɛni ha nɛ bɔfo ko ba plɛ pee Mawu he nyɛlɔ ɔ?

⁶ Jã nɛ e ba ngɛ bɔfo ɔ nɛ wa tu e he munyu ɔ blɔ fa mi. Benɛ Yehowa bɔ Adam kɛ Hawa se ɔ, e de mɛ ke a fɔ nɛ a “hyi zugba a nɔ tsuo.” (1 Mose 1:27, 28) Eko ɔ, jamɛ a bɔfo ɔ de ngɛ e yi mi ke, ‘Tse nimli nɛ ɔmɛ tsuo ma nyɛ ma ja mi mohu pe Yehowa!’ Si abɔ nɛ e ngɛ nɔ́ nɛ ɔ he susue ɔ, si abɔ nɛ akɔnɔ nɛ e ná kaa e nine nɛ su nɔ́ ko nɛ ji Yehowa nɔ́ ɔ nɔ ɔ mi ngɛ wae wawɛɛ. Bɔfo nɛ ɔ suɔ kaa nihi nɛ ja lɛ. Enɛ ɔ he ɔ, e ye Hawa lakpa nɛ e sisi lɛ. (Kane 1 Mose 3:1-5.) Jã nɛ e pee ɔ ha nɛ e ba plɛ pee Satan Abosiami, Mawu he nyɛlɔ.

7. (a) Mɛni he je nɛ Adam kɛ Hawa gbo ɔ? (b) Mɛni he je nɛ wa bwɔɔ nɛ wa gboɔ ɔ?

 ⁷ Adam kɛ Hawa gbo Mawu tue nɛ a ye tso yiblii ɔ. (1 Mose 2:17; 3:6) A pee yayami kɛ si Yehowa, nɛ pee se ɔ, a gbo kaa bɔ nɛ Yehowa de to ɔ. (1 Mose 3:17-19) Adam kɛ Hawa a bimɛ ji yayami peeli, enɛ ɔ he ɔ, mɛ hu a gbo. (Kane Roma Bi 5:12.) Bɔ nɛ pee nɛ waa nu nɔ́ he je nɛ Adam kɛ Hawa a bimɛ hu ji yayami peeli ɔ sisi ɔ, mo susu nɔ́ hetomi nɔ́ nɛ ɔ he nɛ o hyɛ. Ngɔɔ lɛ kaa o ngɔ tsesi ko nɛ boda kɛ ngɛ blodo sãe. Blodo ɔ hu ma boda kaa bɔ nɛ tsesi ɔ hu boda a. Benɛ Adam gbo Mawu tue ɔ, e ba plɛ pee yayami peelɔ. Akɛnɛ Adam bimɛ ji wɔ he je ɔ, wɔ tsuo wa ji yayami peeli, aloo ngɛ blɔ ko nɔ ɔ, wa “boda” kaa bɔ nɛ lɛ hu e boda a. Nɛ akɛnɛ wɔ tsuo wa ji yayami peeli he je ɔ, wa bwɔɔ nɛ wa gboɔ.​​—Roma Bi 3:23; hyɛ Nyagbe Ningma 9.

8, 9. (a) Kɛ Satan suɔ kaa Adam kɛ Hawa nɛ na Yehowa ha kɛɛ? (b) Mɛni he je nɛ Yehowa gbi atua tsɔli ɔmɛ amlɔ nɔuu ɔ?

⁸ Satan tsɔ Yehowa hɛ mi atua benɛ e sisi Adam kɛ Hawa nɛ a gbo Mawu tue ɔ. E suɔ nɛ Adam kɛ Hawa nɛ a na Yehowa kaa e ji lakpatsɛ kɛ nɔ yelɔ yaya, nɛ e sume kaa e hi ha mɛ. Satan ngɛ tsɔɔe kaa e he hia we nɛ Mawu nɛ tsɔɔ adesahi nɔ́ nɛ e sa kaa a pee. E ngɛ tsɔɔe hu kaa e sa nɛ Adam kɛ Hawa nɛ a mwɔ mɛ nitsɛmɛ a yi mi kpɔ ngɛ nɔ́ nɛ da kɛ nɔ́ nɛ dɛ he. Ke jã a, mɛni Yehowa maa pee? Jinɛ e ko nyɛ gbe atua tsɔli ɔmɛ nɛ e ko po atua tsɔmi ɔ se. Se ke e pee jã a, anɛ lɔ ɔ ko tsɔɔ kaa Satan ji lakpatsɛ lo? Ohoo, lɔ ɔ ko tsɔɔ we jã.

⁹ Enɛ ɔ he ɔ, Yehowa gbi atua tsɔli ɔmɛ amlɔ nɔuu. Mohu ɔ, e ngmɛ adesahi blɔ konɛ a ye mɛ nitsɛmɛ a nɔ nɛ a hyɛ. Enɛ ɔ ma ha nɛ nɔ fɛɛ nɔ maa na heii kaa Satan ji lakpatsɛ. A maa na hu kaa Yehowa le nɔ́ nɛ  hi kɛ ha adesahi. Wa maa kase enɛ ɔ he ní fuu ngɛ Yi 11 ɔ mi. Se kɛ o na juɛmi nɛ Adam kɛ Hawa pee ɔ ha kɛɛ? Anɛ e da blɔ kaa a he Satan nɛ a ye nɛ a gbo Mawu tue lo? Nɔ́ tsuaa nɔ́ nɛ Adam kɛ Hawa ngɛ ɔ, Yehowa lɛ ha mɛ. E ha mɛ wami nɛ ye mluku, si hihe nɛ ngɛ fɛu, kɛ ní tsumi nɛ a bua jɔ he. Se Satan pee we  nɔ́ kpakpa ko kɛ ha we mɛ hyɛ. Kaa o ngɛ lejɛ ɔ, jinɛ mɛni o ko pee?

10. Mɛni yi mi kpɔ nɛ he hia lɛ e sa kaa wa ti nɔ fɛɛ nɔ nɛ mwɔ?

¹⁰ Mwɔnɛ ɔ hu ɔ, e biɔ nɛ wa ti nɔ fɛɛ nɔ nɛ mwɔ e yi mi kpɔ kaa e maa bu Satan tue aloo e maa bu Yehowa tue. Wa wami daa si ngɛ yi mi kpɔ nɛ wa maa mwɔ ɔ nɔ. Wa ma nyɛ maa bu Yehowa tue kaa lɛ ji wa Nɔ Yelɔ kɛ ma nɔ mi kaa Satan ji lakpatsɛ, aloo wa ma nyɛ maa ngɔ Satan kɛ pee wa nɔ yelɔ. (La 73:28; kane Abɛ 27:11.) Ngɛ je ɔ mi ɔ, nihi bɔɔ ko pɛ lɛ a buɔ Mawu tue. Ngɛ anɔkuale mi ɔ, pi lɛ nɛ e ngɛ je ɔ nɔ yee. Se ke tsa pi Mawu nɛ ngɛ je ɔ nɔ yee ɔ, lɛɛ mɛnɔ mɔ?

11, 12. (a) Mɛni je ɔ mi matsɛ yemihi nɛ Satan ke e kɛ ma ha Yesu ɔ tsɔɔ? (b) Mɛni ngmamihi tsɔɔ kaa Satan ji nɔ nɛ ngɛ je ɔ nɔ yee?

¹¹ Yesu le nɔ tutuutu nɛ ngɛ je ɔ nɔ yee. Be ko ɔ, Satan “tsɔɔ Yesu matsɛ yemihi tsuo nɛ ngɛ je ɔ mi, kɛ bɔ nɛ a hɛ mi ngɛ nyami ha.” Lɔ ɔ se ɔ, Satan de Yesu ke: “Ke o kpla si nɛ o ja mi ɔ, ma ngɔ enɛ ɔmɛ tsuo kɛ ha mo.” (Mateo 4:8, 9; Luka 4:5, 6) Mo susu he nɛ o hyɛ, ‘Ke tsa pi Satan nɔ́ ji jamɛ a matsɛ yemi ɔmɛ ɔ, anɛ e ko de ke e kɛ ma ha Yesu lo?’ Dɛbi. Nɔ́ nɛ Satan de ɔ tsɔɔ kaa e nɔ́ ji je ɔ mi nɔ yemi ɔmɛ tsuo.

¹² Eko ɔ, o ma bi ke: ‘Mɛni he je nɛ Satan ji nɔ nɛ ngɛ je ɔ nɔ yee ɔ? Anɛ pi Yehowa Mawu Ope ɔ nɛ bɔ je mluku ɔ lo?’ (Kpojemi 4:11) Ee, lɛ nɛ e bɔ, se Yesu tsɔɔ heii kaa Satan ji “nɔ nɛ ngɛ je ɔ nɔ matsɛ yee.” (Yohane 12:31; 14:30; 16:11) Bɔfo Paulo tsɛ Satan Abosiami ke, “je nɛ ɔ mi mawu.” (2 Korinto Bi 4:3, 4) Nɛ bɔfo Yohane hu ngma ke, “je ɔ, Abosiami lɛ ngɛ nɔ yee.”​​—1 Yohane 5:19.

13. Mɛni he je nɛ wa hia je ehe ɔ?

¹³ Níhi ngɛ puɛe kulaa ngɛ je ɔ mi. Ta hwumi, ojo fiami, osato peemi, kɛ yi wu tso ní peepeehi bɔle wɔ kɛ kpe. Ke adesahi bɔ mɔde kaa mɛni po ɔ, a be nyɛe maa tu haomi nɛ ɔmɛ tsuo a nya fo. Se e be kɛe nɛ Mawu ma kpata je yaya nɛ ɔ hɛ mi ngɛ e ta nɛ a tsɛɛ ke Harmagedon ɔ mi. E kɛ je ehe nɛ a peeɔ dami ní ngɛ mi ɔ maa to lɔ ɔ nane mi.​—Kpojemi 16:14-16; hyɛ Nyagbe Ningma 10.

14. Mɛnɔ nɛ Mawu hla kaa e Matsɛ Yemi ɔ nya Matsɛ? Mɛni Baiblo ɔ gba kɛ fɔ si ngɛ Yesu he?

¹⁴ Yehowa hla Yesu Kristo kaa Matsɛ ngɛ lɛ Yehowa a e hiɔwe nɔ yemi ɔ, aloo Matsɛ Yemi ɔ nya. Jeha akpehi abɔ nɛ be ɔ, Baiblo ɔ gba kɛ fɔ si kaa Yesu maa ye nɔ kaa “Ganɔ nɛ yi nɔ jɔ,” nɛ e nɔ yemi ɔ se be poe gblegbleegble. (Yesaya 9:6, 7) Yesu tsɔɔ e se nyɛɛli ɔmɛ kaa a sɔle konɛ nɔ yemi nɛ ɔ nɛ ba. E de mɛ kaa a sɔle ke: “O Matsɛ yemi ɔ nɛ ba; a pee nɔ́ nɛ o suɔ ngɛ zugba a nɔ kaa bɔ nɛ a peeɔ ngɛ hiɔwe ɔ.” (Mateo 6:10) Ngɛ Yi 8 ɔ mi ɔ, wa maa na blɔ nɔ nɛ Mawu Matsɛ Yemi ɔ maa gu kɛ kpata je ɔ mi nɔ yemi ɔmɛ a hɛ mi. (Kane Daniel 2:44.) Lɔ ɔ se ɔ, Mawu Matsɛ Yemi ɔ ma tsake zugba a kɛ pee paradeiso nɛ mi ngɛ fɛu.​—Hyɛ Nyagbe Ningma 11.

15. Mɛni ji “zugba he” ɔ?

¹⁵ Baiblo ɔ wo si ke: “Wa ngɛ hiɔwe he, kɛ zugba he blɔ hyɛe kaa bɔ nɛ Mawu wo si ɔ. Lejɛ ɔ ji he nɛ a yeɔ dami sane ngɛ.” (2 Petro 3:13; Yesaya 65:17) Be komɛ ɔ, ke Baiblo ɔ tu “zugba a” he munyu ɔ, e ngɛ nimli nɛ a ngɛ zugba a nɔ ɔ a he munyu tue. (5 Mose 32:1) Enɛ ɔ  he ɔ, “zugba he” ɔ daa si kɛ ha nihi tsuo nɛ a buɔ Mawu tue nɛ Mawu jɔɔ mɛ ɔ.

16. Mɛni nike ní nɛ se be lɛ Mawu ma ha nihi nɛ a maa hi e je ehe ɔ mi ɔ, nɛ mɛni e sa kaa waa pee konɛ wa nine nɛ su jamɛ a nike ní ɔ nɔ?

¹⁶ Yesu tsɔɔ kaa nihi nɛ maa hi Mawu je ehe ɔ mi ɔ a nine maa su “neneene wami” nɔ. (Marko 10:30) Mɛni e sa kaa waa pee konɛ wa nine nɛ su nike ní nɛ ɔ nɔ? Wa kpa mo pɛɛ nɛ o kane Yohane 3:16 kɛ 17:3 ɔ konɛ o na heto ɔ. Amlɔ nɛ ɔ, nyɛ ha nɛ waa hyɛ bɔ nɛ Baiblo ɔ tsɔɔ kaa zugba a nɔ Paradeiso ɔ mi si himi maa hi ha.

17, 18. Kɛ wa plɛ kɛ le kaa tue mi jɔmi maa hi zugba a nɔ he fɛɛ he, nɛ wa maa hi si ngɛ he jɔmi mi ha kɛɛ?

¹⁷ Yayami peemi, ta hwumi, awi yemi, kɛ basabasa peemi se maa po. Yayami peelɔ ko be zugba a nɔ hie hu. (La 37:10, 11) Mawu ‘ma ha ta se maa po ngɛ je ɔ mi tsuo.’ (La 46:9; Yesaya 2:4) Nihi nɛ a suɔ Mawu nɛ a buɔ lɛ tue ɔ nɛ a maa hi zugba a nɔ. Tue mi jɔmi maa hi zugba a nɔ kɛ ya neneene.​​—La 72:7.

¹⁸ Yehowa we bi maa hi si ngɛ he jɔmi mi. Ngɛ blema Israel bi ɔmɛ a be ɔ mi ɔ, ke a bu Mawu tue ɔ, a hiɔ si ngɛ he jɔmi mi, ejakaa Mawu poɔ a he piɛ. (3 Mose 25:18, 19) Ngɛ Paradeiso ɔ mi ɔ, nɔ́ ko nɔ́ ko be wa he gbeye woe, nɛ jã kɛ̃ nɛ nɔ ko hu be wa he gbeye woe. Wa maa hi si ngɛ he jɔmi mi be fɛɛ be!​​—Kane Yesaya 32:18; Mika 4:4.

19. Mɛni he je nɛ wa ma nyɛ ma ná nɔ mi mami kaa niye ní babauu maa ba ngɛ Mawu je ehe ɔ mi ɔ?

¹⁹ Niye ní maa ba babauu. ‘Zugba a maa ba ní saminya, nɛ a ma ná blɛfo babauu ngɛ yo ɔmɛ tsuo pɛpɛɛpɛ a nɔ.’ (La 72:16) Yehowa ‘wa Mawu ɔ maa gbaa wɔ,’ nɛ ‘zugba a maa ba ní saminya.’​​—La 67:6.

20. Kɛ wa plɛ kɛ le kaa zugba a maa pee paradeiso kɛɛ?

²⁰ Zugba a tsuo ma plɛ pee paradeiso. Nihi maa po  wehi nɛ a ngɛ fɛu, nɛ a maa pee abɔɔhi hu nɛ a mi ngɛ fɛu. (Kane Yesaya 65:21-24; Kpojemi 11:18.) Zugba a nɔ tsuo maa pee fɛu kaa bɔ nɛ Eden abɔɔ ɔ hi ɔ. Be tsuaa be ɔ, Yehowa ma ha wɔ nɔ́ tsuaa nɔ́ nɛ wa hia. Baiblo ɔ de ngɛ e he ke: “O bliɔ o dɛ mi, nɛ o haa nɔ́ tsuaa nɔ́ nɛ ngɛ hɛ ngmengmle tɔɔ.”​​—La 145:16.

21. Kɛ wa plɛ kɛ le kaa tue mi jɔmi maa hi nimli kɛ lohwehi a kpɛti ha kɛɛ?

²¹ Tue mi jɔmi maa hi nimli kɛ lohwehi a kpɛti. Lohwehi be nimli awi yee hu. Lohwehi nɛ a he ngɛ gbeye mwɔnɛ ɔ po be jokuɛwi awi yee jamɛ a be ɔ mi.​​—Kane Yesaya 11:6-9; 65:25.

22. Mɛni Yesu maa pee ha hiɔtsɛmɛ?

²² Hiɔ se maa po. Benɛ Yesu ngɛ zugba a nɔ ɔ, e tsa hiɔtsɛmɛ fuu. (Mateo 9:35; Marko 1:40-42; Yohane 5:5-9) Se ke Mawu Matsɛ Yemi ɔ ná ba zugba a nɔ ɔ, Yesu nɛ ji Matsɛ Yemi ɔ nya Matsɛ ɔ, ma tsa nɔ fɛɛ nɔ. Nɔ ko be dee hu ke: “I be he wami.”​​—Yesaya 33:24; 35:5, 6.

23. Mɛni Mawu maa pee ha nihi nɛ a gbo ɔ?

²³ A ma tle gbogboehi a si. Mawu wo wɔ si kaa e ma tle nimli ayɔhi abɔ nɛ a gbo ɔ si. “Adesahi tsuo maa te si kɛ je gbeje hwɔɔ se, ni kpakpahi jio, yayami peeli jio.”​​—Kane Yohane 5:28, 29; Bɔfo Ɔmɛ A Ní Tsumi 24:15.

24. Kɛ o naa si nɛ o maa hi ngɛ Paradeiso mi ɔ ha kɛɛ?

²⁴ Wɔ tsuo wa ma nyɛ maa mwɔ wa yi mi kpɔ kaa wa maa kase Yehowa he ní nɛ wa ma sɔmɔ lɛ, aloo wa maa pee wa tsui nya ní. Ke wa sɔmɔ Yehowa a, wa ma nyɛ ma ná jɔɔmi hwɔɔ se. Benɛ nyumu ko de Yesu kaa ke e gbo ɔ, Yesu nɛ kai lɛ ɔ, Yesu wo lɛ si ke: “I kɛ mo maa hi Paradeiso.” (Luka 23:43) Ha waa kase Yesu Kristo he ní fuu, nɛ waa hyɛ blɔ nɔ nɛ e maa gu kɛ ha nɛ Mawu si womihi nɛ ngɛ bua jɔmi ɔ maa ba mi.