1, 2. Mɛni he blɔ ngua nɛ Yehowa Odasefoli ná, nɛ kɛ o buu he blɔ nɛ ɔ ha kɛɛ?

KE NIHI pee nɔ́ ngua ko nɛ a ha mɛ nike ní ngɛ he ɔ, a naa lɛ kaa a wo a hɛ mi nyami wawɛɛ nitsɛ. Kaa nɔ hyɛmi nɔ́ ɔ, a woɔ ni komɛ a hɛ mi nyami kaa a ye bua nɛ tue mi jɔmi ba ma enyɔ a kpɛti. Se tsɔmi nɛ Mawu tsɔ wɔ kaa wa ya ye bua nihi konɛ tue mi jɔmi nɛ hi a kɛ a Bɔlɔ ɔ a kpɛti ɔ ji hɛ mi nyami nɛ pe kulaa!

² Wɔ Yehowa Odasefoli pɛ nɛ wa ná he blɔ ngua nɛ ɔ. Mawu kɛ Kristo fã wɔ kaa wa kpa nihi pɛɛ nɛ ‘a dla a kɛ Mawu a kpɛti.’ (2 Kor. 5:20) Yehowa gu wa nɔ kɛ ngɛ nihi gblae kɛ ngɛ e ngɔ bae. Enɛ ɔ ha nɛ nimli ayɔhi abɔ nɛ a ngɛ mahi nɛ hiɛ pe 235 a nɔ ɔ ba plɛ Mawu huɛmɛ, nɛ a ngɛ hɛ kɛ nɔ fɔmi kaa a ma ná neneene wami. (Tito 2:11) Wa ngɛ fiɛɛe kɛ hɛdɔ kɛ ngɛ nihi nine fɔe konɛ “nɔ tsuaa nɔ nɛ suɔ ɔ, e ba ngɔ nyu nɛ haa nɔ wami ɔ kaa nike ní.” (Kpoj. 22:17) Akɛnɛ wa bua jɔ nítsumi nɛ he hia nɛ ɔ he nɛ́ waa kɛ kã tsuɔ heje ɔ, tɔmi ko be he kaa a ma tsɛ wɔ ke ‘nihi nɛ a hɛ dɔɔ ngɛ nítsumi kpakpahi a he.’ (Tito 2:14) Nyɛ ha nɛ wa susu bɔnɛ wa hɛ nɛ dɔɔ ngɛ nítsumi kpakpahi a he ɔ yeɔ bua wɔ nɛ wa gblaa nihi kɛ baa Yehowa ngɔ ha a he. Wa fiɛɛmi nítsumi ɔ ji blɔ kake nɔ nɛ wa guu kɛ peeɔ enɛ ɔ.

3. ‘Hɛdɔ nɛ Yehowa kɛ tsuɔ níhi a he ní’ ɔ tsɔɔ kaa e sa nɛ waa pee mɛni?

³ Yesaya 9:7 de kɛ kɔ nɔ́ nɛ Mawu Bi ɔ nɔ yemi ɔ ma tsu ɔ he ke: ‘Yehowa tabohiatsɛ ɔ kɛ hɛdɔ ma tsu ní nɛ ɔmɛ tsuo.’ Munyu nɛ ɔ maa nɔ mi kaa wa hiɔwe Tsɛ ɔ suɔ wawɛɛ kaa e ma he adesahi a yi wami. Hɛdɔ nɛ Yehowa kɛ tsuɔ níhi a he ní ɔ tsɔɔ heii kaa e sa nɛ waa je wa tsui tsuo mi kɛ fĩ Matsɛ Yemi fiɛɛmi nítsumi ɔ nɛ e kɛ wo wa dɛ ɔ se, nɛ waa kɛ gɛjɛmi, kɛ hɛdɔ nɛ tsu. Suɔmi nɛ wa suɔ wawɛɛ kaa wa maa ye bua nihi konɛ a ba le Mawu ɔ tsɔɔ kaa wa ngɛ bɔnɛ Yehowa kɛ hɛdɔ tsuɔ níhi a he ní ha a kasee. Lɛɛ akɛnɛ wa piɛɛ Mawu  he kɛ ngɛ ní tsue heje ɔ, anɛ wa ti nɔ tsuaa nɔ mwɔ e yi mi kpɔ kaa e kɛ e he maa wo sane kpakpa fiɛɛmi nítsumi ɔ mi kɛ pi si bɔnɛ wa si himi maa ngmɛ wɔ blɔ lo?—1 Kor. 3:9.

4. Mɛni blɔ nɔ Yesu pee nɔ hyɛmi nɔ́ kɛ ha wɔ ngɛ bɔnɛ e kɛ hɛdɔ to e tsui si ngɛ sɔmɔmi nítsumi ɔ mi ɔ he ngɛ?

⁴ Mo susu hɛdɔ nɛ Yesu hu kɛ tsuɔ níhi a he ní ɔ he nɛ o hyɛ. E pee nɔ hyɛmi nɔ́ nɛ hi kɛ pi si kɛ ha wɔ ngɛ bɔnɛ e kɛ hɛdɔ to e tsui si ngɛ sɔmɔmi nítsumi ɔ mi ɔ he. Ngɛ si nɛ nihi te kɛ wo lɛ wawɛɛ ɔ tsuo se ɔ, e ya nɔ nɛ e kɛ hɛdɔ tsu fiɛɛmi nítsumi ɔ hluu kɛ ya si e gbo gbenɔ yeyee. (Yoh. 18:36, 37) Benɛ e piɛ bɔɔ nɛ Yesu maa ngɔ e he kɛ sã afɔle konɛ e gbo ɔ, e bɔ mɔde wawɛɛ nɛ e ye bua nihi konɛ a ba le Yehowa.

5. Mɛni blɔ nɔ Yesu gu kɛ pee e ní kaa ngmɔkɔ nɔ hyɛlɔ ɔ nɛ ngɛ Yesu nɔ́ hetomi nɔ́ ɔ mi ɔ?

⁵ Kaa nɔ hyɛmi nɔ́ ɔ, ngɛ jeha 32 M.B. ɔ, Yesu kɛ nɔ́ hetomi nɔ́ ko tsu ní kɛ kɔ nyumu ko nɛ e ngɛ ngmɔkɔ tso ko ngɛ e ngmɔ mi nɛ wui yiblii jeha etɛ ɔ he. Benɛ nyumu ɔ de ngmɔkɔ nɔ hyɛlɔ ɔ kaa e po tso ɔ ngɔ fɔ si ɔ, ngmɔkɔ nɔ hyɛlɔ ɔ de lɛ kaa e ha lɛ be bɔɔ ko, nɛ e wo ngmɔkɔ tso ɔ sisi kuku nɛ a hyɛ. (Kane Luka 13:6-9.) Benɛ Yesu tu munyu nɛ ɔ, nihi bɔɔ ko pɛ nɛ a ba plɛ e kaseli. Se kaa bɔnɛ ngmɔkɔ nɔ hyɛlɔ ɔ pee ngɛ nɔ́ hetomi nɔ́ nɛ ɔ mi ɔ, Yesu ngɔ be bɔɔ nɛ piɛ, maa pee nyɔhiɔ ekpa a kɛ fiɛɛ wawɛɛ pe bɔnɛ e fiɛɛɔ daa ngɛ Yudea kɛ Perea a. Benɛ e piɛ ligbi bɔɔ ko loko Yesu ma gbo ɔ, e fo ya kɛ ha e ma mi bimɛ ɔmɛ nɛ ‘a wa tue, nɛ a nui’ e munyu ɔ. —Mat. 13:15; Luka 19:41.

6. Mɛni heje nɛ e sa nɛ kã nɛ waa kɛ tsuɔ fiɛɛmi nítsumi ɔ mi nɛ wa a?

⁶ Akɛnɛ wa ngɛ nyagbe ligbi ɔ mi vii heje ɔ, anɛ e he hia we nɛ wa ha nɛ kã nɛ waa kɛ tsuɔ fiɛɛmi nítsumi ɔ mi nɛ wa lo? (Kane Daniel 2:41-45.) E ji he blɔ ngua nɛ wa ná kaa wa ji Yehowa we Odasefoli! Ngɛ zugba a nɔ tsuo ɔ, wɔ pɛ nɛ wa tsɔɔ nihi nɔ́ tutuutu nɛ ma nyɛ ma tsu adesahi a haomihi a he ní ha mɛ. Adafi fiami womi ngmalɔ ko de lingmi nɛ ɔ kaa nɔ ko nɔ ko be nyɛe maa tsɔɔ nɔ́ heje nɛ haomihi baa nimli kpakpahi a nɔ ɔ. Se Baiblo ɔ de wɔ nɔ́ heje nɛ haomi baa nimli kpakpahi a nɔ. Akɛnɛ wa ji Kristofoli heje ɔ, e ji wa blɔ nya nítsumi kɛ he blɔ nɛ wa ná kaa waa tsɔɔ nihi nɛ a le nɔ́ heje nɛ haomi baa nimli kpakpahi a nɔ ɔ. E sa nɛ waa kɛ “hɛdɔ nɛ tsu” nítsumi nɛ Mawu kɛ wo wa dɛ ɔ. (Rom. 12:11) Mawu maa jɔɔ fiɛɛmi nɛ wa fiɛɛɔ kɛ hɛdɔ ɔ nɔ, nɛ wa ma nyɛ maa ye bua nihi nɛ́ a ba le Yehowa nɛ a suɔ lɛ.

7, 8. Mɛni blɔ nɔ wa he nɛ waa kɛ sãa afɔle ɔ woɔ Yehowa hɛ mi nya ngɛ?

⁷ Kaa bɔnɛ e ba ngɛ bɔfo Paulo blɔ fa mi ɔ, eko ɔ, wa sɔmɔmi nítsumi ɔ ma ha nɛ wa ‘be mahe hwɔe,’ nɛ ‘hwɔ hu maa ye wɔ.’ (2 Kor. 6:5) Munyu nɛ ɔ tsɔɔ he kɛ afɔle sami nitsɛnitsɛ. Enɛ ɔ ma nyɛ ma kai wɔ blɔ gbali nɛ a ngɛ wa kpɛti nɛ a kɛ fiɛɛmi nítsumi ɔ pee nɔ́ titli ngɛ a si himi mi, nɛ́ mɛ nitsɛmɛ nɔuu lɛ a hyɛɛ a he ɔ. Mo susu ma se sane kpakpa fiɛɛli nɛ a ‘plɛ a he kɛ pue si kaa dã afɔle’ konɛ a nyɛ nɛ a sɔmɔ nihi ngɛ ma se zugbahi a nɔ ɔ he nɛ o hyɛ. (Filip. 2:17) Nɛ wa asafo mi nikɔtɔma amɛ nɛ be komɛ ɔ, a yi ní aloo a hwɔ we mahe konɛ a nyɛ nɛ a hyɛ Yehowa to ɔmɛ a nɔ ɔ hu nɛɛ? Wa ngɛ nihi hu nɛ a bwɔ kɛ nihi nɛ hiɔ ngɛ a nya gbae, se a bɔɔ mɔde nɛ a baa asafo mi kpehi nɛ a yaa fiɛɛmi. Ke wa susu Mawu sɔmɔli nɛ ɔmɛ nɛ a kɛ a he sãa afɔle ɔ a he ɔ, wa bua jɔɔ wawɛɛ nitsɛ. Enɛ ɔ nɛ a peeɔ ɔ ha nɛ nihi nɛ a be asafo ɔ mi po naa kaa wa sɔmɔmi nítsumi ɔ he hia wɔ wawɛɛ.

⁸ Nyumu ko nɛ tsa pi Odasefono ji lɛ, nɛ e kaneɔ United Kingdom adafi fiami womi ko nɛ a tsɛɛ ke Boston Target ɔ, ngma ya ha nihi nɛ ngmaa adafi fiami womi ɔ ke: ‘Nihi a hemi kɛ yemi ngɛ jami mi ɔ ngɛ si bae. Mɛni jami nya dali ngɛ tsue? A yɛ ni ɔmɛ a  ngɔ kaa bɔnɛ Kristo pee ɔ. Jami pɛ nɛ e susuɔ nihi a he ji Yehowa Odasefoli. A jeɔ a tsui mi nɛ a yaa nihi a ngɔ ya fiɛɛɔ anɔkuale ɔ kɛ tsɔɔ mɛ.’ Nihi nɛ a ngɛ je ɔ mi ɔ a kpɛti nihi fuu sume kaa a kɛ a he maa sã afɔle ngɛ nihi a he. Se akɛnɛ wɔɔ lɛɛ wa suɔ kaa waa kɛ wa he nɛ sã afɔle nɛ waa fiɛɛ heje ɔ, enɛ ɔ woɔ Yehowa Mawu hɛ mi nyami.​—Rom. 12:1.

9. Mɛni maa ye bua wɔ konɛ waa ya nɔ nɛ wa hɛ nɛ dɔ ngɛ nítsumi kpakpahi a he ngɛ wa sɔmɔmi nítsumi ɔ mi?

⁹ Se ke hɛdɔ nɛ waa kɛ tsuɔ wa sɔmɔmi nítsumi ɔ ngɛ si bae ɔ, mɛni wa ma nyɛ maa pee? E maa hi wawɛɛ kaa wa ma susu nɔ́ nɛ Yehowa ngɛ tsue kɛ gu fiɛɛmi nítsumi ɔ nɔ ɔ he. (Kane Romabi 10:13-15.) Loko a ma he nɔ ko yi wami ɔ, ja e kɛ hemi kɛ yemi tsɛ Yehowa biɛ, se nihi be nyɛe maa pee jã ke nɔ ko fiɛɛ we ha mɛ. E sa nɛ enɛ ɔ nɛ wa le ɔ nɛ wo wɔ he wami konɛ waa ya nɔ nɛ wa hɛ nɛ dɔ ngɛ nítsumi kpakpahi a he, nɛ́ waa kɛ kã nɛ fiɛɛ Matsɛ Yemi ɔ he sane kpakpa a.

10. Mɛni heje nɛ wa ma nyɛ ma de ke wa je mi bami kpakpa a gblaa nihi kɛ suɔ Yehowa he ɔ?

¹⁰ Tsa pi hɛdɔ nɛ waa kɛ ma tsu sɔmɔmi nítsumi ɔ pɛ kɛkɛ nɛ ma ha nɛ nihi maa suɔ kaa a maa le Mawu. Nɔ́ enyɔne nɛ piɛɛ nítsumi kpakpahi nɛ e sa kaa wa hɛ nɛ dɔ ngɛ a he ɔ he ji, je mi bami kpakpa nɛ Kristofoli jeɔ kpo. Paulo ma nɔ mi kaa e he hia nɛ waa ba wa je mi saminya. E ngma ke: “Wa bɔɔ mɔde kaa wa ko ngɔ nɔ́ ko kɛ tsi nihi blɔ, bɔnɛ pee nɛ a ko gbe sɔmɔmi nítsumi nɛ wa hɛɛ mi ɔ he guɛ.” (2 Kor. 6:3) Munyu nɛ he tsɔ nɛ wa tuɔ, kɛ wa je mi nɛ wa baa saminya a haa nɛ nihi a bua jɔɔ he kaa a ma ja Yehowa. (Tito 2:10) Ngɛ anɔkuale mi ɔ, wa pɔɔ numi kaa ke nihi na kaa wa baa wa je mi kaa Kristo ɔ, lɔɔ haa nɛ a kplɛɛɔ anɔkuale ɔ nɔ.

11. Mɛni heje nɛ e sa kaa waa kɛ sɔlemi nɛ susu bɔnɛ wa je mi bami ma nyɛ maa sa nihi a he ha a he ɔ?

¹¹ Kaa bɔnɛ ke wa ba wa je mi saminya  nɛ lɔɔ ma ha nɛ nihi maa suɔ kaa a kase Yehowa he ní ɔ, jã nɔuu kɛ̃ nɛ ke wa bɛ wa je mi saminya a, lɔɔ maa fiee nihi kɛ je Yehowa he. Enɛ ɔ he ɔ, ke wa ngɛ nítsumi he jio, we mi jio, sukuu jio, e sɛ nɛ waa pee nɔ́ ko nɛ ma nɛ ha nɛ nihi maa gbe wa sɔmɔmi nítsumi ɔ he guɛ. Ke wa je blɔ pee yayami ɔ, huɛ bɔmi nɛ ngɛ waa kɛ Yehowa wa kpɛti ɔ ma nyɛ ma puɛ kɛ ya neneene. (Heb. 10:26, 27) E sa nɛ enɛ ɔ nɛ wo wɔ he wami konɛ waa kɛ sɔlemi nɛ susu níhi nɛ wa peeɔ kɛ bɔnɛ nihi naa wɔ ha a he wawɛɛ. Nihi a je mi bami ngɛ puɛe kulaa ngɛ je ɔ mi, enɛ ɔ he ɔ, e sa nɛ wa ha nɛ nihi nɛ na ‘slɔɔto nɛ ngɛ nɔmlɔ nɛ sɔmɔɔ Mawu, kɛ nɔ nɛ sɔmɔ we lɛ ɔ a kpɛti.’ (Mal. 3:18) Niinɛ, e he hia nɛ waa ba wa je mi saminya ejakaa lɔɔ ma nyɛ ma dla nihi kɛ Mawu a kpɛti.

12-14. Mɛni blɔ nɔ wa tsui si nɛ wa toɔ ngɛ hemi kɛ yemi he kahi nɛ waa kɛ kpeɔ ɔ mi ɔ saa bɔnɛ nihi buɔ wa sɔmɔmi nítsumi ɔ ha a he ngɛ? Mo ha enɛ ɔ he nɔ hyɛmi nɔ́.

¹² Ngɛ womi nɛ Paulo ngma ya ha Korintobi ɔmɛ ɔ mi ɔ, e tsɔɔ kaa e kɛ haomi, kɛ fimi, kɛ he hiami kpe, nɛ a fia mɛ ní, nɛ a wo mɛ tsu. (Kane 2 Korintobi 6:4, 5.) Ke waa kɛ ka kpe nɛ wa to wa tsui si ɔ, lɔɔ ma nyɛ maa ye bua nihi konɛ a kplɛɛ anɔkuale ɔ nɔ. Kaa nɔ hyɛmi nɔ́ ɔ, jeha komɛ nɛ be ɔ, nihi to a yi mi kaa a maa gu Yehowa Odasefoli ngɛ Angola ma a mi he ko. A nuu Odasefoli enyɔ nɛ a baptisi mɛ kɛ nihi 30 nɛ a ngɛ munyu ɔ he bua jɔmi nɛ́ a yaa wa kpehi ɔ. Ni ɔmɛ fia wa nyɛmimɛ ɔmɛ kpa hluu nɛ a he tsuo poopoo kɛ muɔ. A nyɛ nihi nɛ a ngɛ kpɔ ɔ mi ɔ a nɔ nɛ a bua a he nya nɛ a ngɛ hyɛe. Yihi kɛ jokuɛwi nɛ a piɛɛ he po a fia mɛ kpa. Yi mi tomi nɛ a kɛ pee jã ji, nɛ́ a kɛ wo nihi a he gbeye konɛ nɔ ko nɛ ko bu Yehowa Odasefoli tue hu. Se benɛ a fia mɛ kpa ngɛ ma hɛ mi ta a, kpɔ ɔ mi bimɛ ɔmɛ a ti nihi fuu su Yehowa Odasefoli a he nɛ a de mɛ kaa a suɔ nɛ a kɛ mɛ nɛ ba pee we mi Baiblo mi nikasemi! Lɔɔ se ɔ, Matsɛ Yemi fiɛɛmi nítsumi ɔ ya hɛ mi, nɛ nihi fuu ba anɔkuale ɔ mi, nɛ Mawu jɔɔ nyɛmimɛ ɔmɛ.

¹³ Nɔ hyɛmi nɔ́ nɛ ɔ tsɔɔ kaa ke wa fĩ si kpɛii nɛ waa kɛ Baiblo sisi tomi mlaahi tsu ní be mi nɛ waa kɛ ka kpe ɔ, e ma nyɛ ma ná nihi a nɔ he wami. Eko ɔ, kã nɛ Petro kɛ bɔfo kpa amɛ pee ɔ ha nɛ huɛ bɔmi kpakpa hi nihi kɛ Mawu a kpɛti. (Níts. 5:17-29) Eko ɔ, ngɛ wa blɔ fa mi ɔ, nihi nɛ waa kɛ mɛ yaa sukuu, nihi nɛ waa kɛ mɛ tsuɔ ní, aloo wa weku mi bimɛ maa kplɛɛ anɔkuale ɔ nɔ ke a na kaa wa suɔ kaa waa pee nɔ́ nɛ da a.

¹⁴ A waa wa nyɛmimɛ ɔmɛ ekomɛ a yi mi be tsuaa be. Kaa nɔ hyɛmi nɔ́ ɔ, ngɛ Armenia a, a wo nyɛmimɛ maa pee 40 tsu akɛnɛ a sume nɛ a kɛ a he nɛ wo ma kudɔmi sanehi a mi ɔ heje. Eko ɔ, e be kɛe nɛ a maa wo Odasefoli kpahi hu nɛ a ngɛ ma a mi ɔ babauu tsu. Ngɛ Eritrea a, a wo Yehowa sɔmɔli 55 tsu. A ti ni komɛ ye pe jeha 60. Ngɛ South Korea a, a wo Odasefoli maa pee 700 tsu ngɛ a hemi kɛ yemi ɔ he. Jeha 60 ji nɛ ɔ nɛ a ngɛ Odasefoli tsu woe ngɛ ma nɛ ɔ nɔ. Nyɛ ha nɛ waa sɔle kɛ ha wa nyɛmimɛ nɛ a ngɛ mɛ yi mi wae ɔ konɛ a ye anɔkuale, nɛ́ lɔɔ nɛ wo Mawu hɛ mi nyami, nɛ́ e ye bua nihi nɛ a suɔ nɔ́ nɛ da a, konɛ a kplɛɛ anɔkuale ɔ nɔ.—La 76:8-10.

15. Mo ha níhi a si kpami ko nɛ tsɔɔ kaa ke wa yeɔ anɔkuale ɔ, nihi maa suɔ kaa a maa kase anɔkuale ɔ.

¹⁵ Anɔkuale nɛ wa yeɔ ɔ hu ma nyɛ ma ha nɛ nihi maa suɔ kaa a maa kase anɔkuale ɔ. (Kane 2 Korintobi 6:4, 7.) Kaa nɔ hyɛmi nɔ́ ɔ, mo susu níhi a si kpami nɛ ɔ he nɛ o hyɛ: Nyɛmiyo ko kuɔ bɔɔsu nɛ e ngɛ sika jee konɛ e po tikiti. Nɔ ko nɛ nyɛmiyo ɔ le lɛ, nɛ lɛ hu e ngɛ bɔɔsu ɔ mi ɔ de nyɛmiyo ɔ ke, e he hia we nɛ e po tikiti, ejakaa he nɛ e yaa a kɛ we. Nyɛmiyo ɔ de nɔ ɔ kaa ke he nɛ e yaa a kɛ we kulaa po ɔ, e sa nɛ e po tikiti. Lɔɔ se ɔ, nɔ ɔ su he nɛ e yaa a nɛ e kple si. Kɛkɛ nɛ bɔɔsu hɛɛlɔ ɔ plɛ nɛ e hyɛ nyɛmiyo ɔ, nɛ e bi lɛ ke, “Yehowa Odasefono ji mo lo?” Nyɛmiyo ɔ ha heto ke, “Ee, mɛni heje nɛ o bi mi jã a?” Bɔɔsu hɛɛlɔ ɔ ha heto ke, “I bu nyɛ ní sɛɛmi nɛ  kɔɔ tikiti pomi he ɔ tue, nɛ i le kaa Yehowa Odasefoli piɛɛ nihi bɔɔ pɛ nɛ a peeɔ jã nɛ a yeɔ anɔkuale ngɛ nɔ́ tsuaa nɔ́ mi ɔ a he.” Nyɔhiɔ bɔɔ ko se ɔ, nyumu ko su nyɛmiyo ɔ he ngɛ kpe ko sisi nɛ e bi nyɛmiyo ɔ ke, “O le mi lo? Imi ji bɔɔsu hɛɛlɔ ɔ nɛ e kɛ mo tu munyu kɛ kɔ tikiti pomi he ɔ nɛ. Bɔnɛ o ba o je mi ha a, ha nɛ i ma ye juɛmi nya si kaa i kɛ Yehowa Odasefoli ma bɔni Baiblo ɔ kasemi.” Ke nihi na kaa wa yeɔ anɔkuale ɔ, lɔɔ haa nɛ a heɔ sane kpakpa nɛ wa fiɛɛɔ yeɔ.

16. Mɛni heje nɛ nihi a bua jɔɔ su komɛ kaa tsui si tomi, suɔmi, kɛ mi mi jɔmi he ɔ? Mo ha enɛ ɔ he nɔ hyɛmi nɔ́.

¹⁶ Ke wa je su komɛ kaa tsui si tomi, suɔmi, kɛ mi mi jɔmi kpo ɔ, lɔɔ hu maa gbla nihi kɛ su Yehowa he. Eko ɔ, ni komɛ nɛ a maa na wɔ ɔ maa suɔ nɛ a kase Yehowa, e yi mi tomihi, kɛ e webi a he ní. Su nɛ anɔkuale Kristofoli jeɔ kpo kɛ bɔnɛ a baa a je mi ha a ngɛ ekpa kulaa ngɛ nihi nɛ a peeɔ osato ɔ a nɔ́ ɔ he. Jami nya dali komɛ ná ní kpɔtɔɔ kɛ gu a we asafo mi bimɛ ɔmɛ nɛ a sisiɔ ɔ nɔ, nɛ a kɛ sika a maa we nguahi, nɛ a heɔ lɔlehi nɛ a he jua wa. Nɔ ko po lɛɛ e ma tsu kɛ ha gbehi nɛ e kɛ air condition wo mi. Ngɛ anɔkuale mi ɔ, nihi fuu nɛ a tsɛɔ a he ke Kristo se nyɛɛli ɔ sume kaa a ma ‘ha nɔ́ yaka gu.’ (Mat. 10:8) Mohu ɔ, kaa bɔnɛ Israel osɔfo yaya amɛ pee ɔ, ‘a heɔ hiɔwo loko a tsɔɔ ní,’ nɛ níhi fuu nɛ a tsɔɔ nihi ɔ be Ngmami ɔ mi. (Mika 3:11) Osato ní peepee nɛ ɔ dla we nihi kɛ Mawu a kpɛti.

17, 18. (a) Mɛni blɔ nɔ Yehowa suhi nɛ wa jeɔ kpo ɔ woɔ Yehowa hɛ mi nyami ngɛ? (b) Mɛni heje nɛ o suɔ nɛ o ya nɔ nɛ o hɛ nɛ dɔ ngɛ nítsumi kpakpahi a he ɔ?

¹⁷ Se nihi a bua jɔɔ anɔkuale Kristofoli a tsɔɔmi kɛ ní kpakpahi nɛ a peeɔ kɛ haa nihi nɛ a kɛ mɛ ngɛ kpɔ mi ɔ he wawɛɛ. Kaa nɔ hyɛmi nɔ́ ɔ, ligbi ko ɔ blɔ gbalɔ ko ngɛ fiɛɛe ngɛ sinyahi a nya. E ya nyɛ yo nɔkɔtɔma ko nɛ e huno gbo ɔ sinya ngmlɛ nɔ, se yo ɔ de lɛ ke e be munyu ɔ he bua jɔmi. Yo ɔ de blɔ gbalɔ ɔ kaa benɛ e nyɛ e sinya a ngmlɛ ɔ nɔ ɔ, e kuɔ gba he tso nɛ e ngɛ mɔde bɔe konɛ e tsake e kpata a mi bɔɔbu nɛ sã a. Blɔ gbalɔ ɔ de yo ɔ ke: “E sɛ nɛ mo nɔ kake pɛ o pee enɛ ɔ.” Kɛkɛ nɛ blɔ gbalɔ ɔ tsake bɔɔbu ɔ ha lɛ nɛ e je. Benɛ yo ɔ binyumu nu nɔ́ nɛ ba a he ɔ, e bua jɔ wawɛɛ nɛ e suɔ nɛ e na blɔ gbalɔ ɔ konɛ e na lɛ si. Nyagbe ɔ, yo ɔ binyumu ɔ kplɛɛ kaa a kɛ lɛ nɛ kase Baiblo ɔ.

¹⁸ Mɛni heje nɛ o suɔ nɛ o ya nɔ nɛ o hɛ nɛ dɔ ngɛ nítsumi kpakpahi a he ɔ? Eko ɔ, akɛnɛ o le kaa ke waa kɛ hɛdɔ tsu wa sɔmɔmi nítsumi ɔ, nɛ wa pee Mawu suɔmi nya ní ɔ, lɔɔ woɔ Yehowa hɛ mi nyami, nɛ lɔɔ ma nyɛ maa ye bua nihi konɛ a he a yi wami ɔ heje. (Kane 1 Korintobi 10:31-33.) Nɔ́ kpa hu heje nɛ waa kɛ hɛdɔ fiɛɛɔ nɛ wa baa wa je mi saminya ji, wa suɔ nitsɛnitsɛ kaa wa maa tsɔɔ kaa wa suɔ Mawu kɛ ni kpahi. (Mat. 22:37-39) Ke wa hɛ dɔɔ ngɛ nítsumi kpakpahi a he ɔ, wa ma ná bua jɔmi nitsɛnitsɛ nɛ wa tsui hu maa nɔ wa mi amlɔ nɛ ɔ. Jehanɛ se hu ɔ, wa ma nyɛ maa hyɛ be nɛ adesahi tsuo a hɛ maa dɔ ngɛ anɔkuale jami he konɛ a wo wa Bɔlɔ nɛ ji Yehowa a hɛ mi nyami ɔ blɔ.