Anɛ O Le Lo?
Ngɛ mɛni blɔ nɔ nɛ bliikisi nɛ a na ngɛ blema Babilon kɛ bɔ nɛ a plɛ kɛ pee bliikisi nɛ ɔmɛ ha a tsɔɔ kaa Baiblo ɔ da pɛpɛɛpɛ ɔ?
NGƐ blema Babilon ɔ, nihi nɛ a tsuaa si kɛ hlaa blema níhi ɔ ya na bliikisi fuu nɛ a sã. A kɛ bliikisi nɛ ɔmɛ nɛ ma blema Babilon ma a. Nihi nɛ a tsuaa si kɛ hlaa blema níhi ɔ a kpɛti nɔ kake nɛ a tsɛɛ lɛ ke Robert Koldewey tsɔɔ kaa a sãa bliikisi nɛ ɔmɛ ngɛ flɔɔnɔɔ mi “ngɛ ma a se he a naa zu kpakpa kɛ lɛhi . . . fuu ngɛ.”
Nihi nɛ a tsuaa si kɛ hlaa blema níhi ɔ yɔse kaa nɔ yeli nɛ a hi si ngɛ Babilon ɔ ngɔɔ flɔɔnɔɔhi kɛ peeɔ nɔ́ ko nɛ hí kulaa. Ní lelɔ ko nɛ e tsɔɔ ní ngɛ University of Toronto nɛ a tsɛɛ lɛ ke Paul-Alain Beaulieu nɛ e kase blema Asiria bi ɔmɛ a yi nɔ sane he ní saminya a de ke: “Babilon bi a womi komɛ . . . tsɔɔ kaa matsɛ ɔ fã kaa nihi nɛ a gboɔ e nɔ tue loo a be bumi kɛ ha ní klɔuklɔu ɔmɛ ɔ, a sake mɛ kɛ wo flɔɔnɔɔ mi, nɛ a sã mɛ.” Munyu komɛ nɛ a ngma ngɛ Matsɛ Nebukadnezar be ɔ mi ɔ ji: “Nyɛ kpata a hɛ mi, nyɛɛ sã mɛ, nyɛɛ tsukɔ mɛ . . . ngɛ flɔɔnɔɔ mi . . . nyɛ ha nɛ a he lasuku nɛ be kɛ ho kɔɔhiɔ mi ya, nyɛ sake mɛ ngɔ wo la mi nɛ a gbo.”
Munyu nɛ ɔmɛ kaiɔ nihi nɛ a kaneɔ Baiblo ɔ níhi nɛ ya nɔ nɛ a tu he munyu ngɛ Daniel yi 3 ɔ. Ngɛ jamɛ a ngmami ɔ nya a, wa na kaa Matsɛ Nebukadnezar ngɔ sika tsu kɛ pee amaga ngua ko ngɛ Dura nga a nɔ ngɛ Babilon ma a se. Benɛ Hebri nihewi etɛ nɛ a tsɛɛ mɛ ke Shadrak, Meshak kɛ Abednego ɔ kua ke a be si kplãe nɛ a ja amaga nɛ ɔ, Nebukadnezar mi mi fu wawɛɛ. E fã ke a wo flɔɔnɔɔ ɔ mi la nɛ e “dɔ si kpaago pe bɔ nɛ e dɔɔ daa a,” nɛ a ‘sake nihewi etɛ nɛ ɔmɛ ngɔ pue flɔɔnɔɔ kɛ e mi la nɛ ngɛ tsoe gegeege ɔ mi.’ Bɔfo ko nɛ e ngɛ he wami wawɛɛ ɔ ba he a yi wami nɛ a gbo we.—Dan. 3:1-6, 19-28.
© The Trustees of the British Museum. Licensed under CC BY-NC-SA 4.0. Source
Bliikisi ko nɛ a ngma Nebukadnezar biɛ ngɛ nɔ
Bliikisi nɛ a na ngɛ Babilon ɔ hu maa nɔ́ mi kaa munyuhi nɛ ngɛ Baiblo ɔ mi ɔ da pɛpɛɛpɛ. A ngma yi jemi munyu komɛ kɛ ha matsɛ ɔ ngɛ bliikisi nɛ ɔmɛ fuu a nɔ. Munyu nɛ ɔmɛ a kpɛti kake ji: “Babilon Matsɛ Nebukadnezar . . . Matsɛ we ɔ, nɛ imi Matsɛ Nɛ Nɔ Kuɔ Pe Kulaa a, i ma a ji nɛ ɔ nɛ . . . Ye nina nɛ hi we nɛ ɔ mi kɛ ye nɔ daa.” Munyu nɛ ɔ ngɛ kaa munyu nɛ a ngma ngɛ Daniel 4:30 ɔ. Ngɛ ngmami nɛ ɔ mi ɔ, Nebukadnezar fĩa nɛ e de ke: “Nyɛɛ hyɛ bɔ nɛ Babilon kle agbo ha! Imi nitsɛ lɛ i po Babilon, nɛ i kɛ lɛ pee ye matsɛ ma, konɛ ma kɛ tsɔɔ ye he wami kpetekpleenyɛ, ye biɛ, ye hɛ mi nyami, kɛ ye agboje.”
