Mwɔnɛ ɔ, a pee Baiblo kasemi womihi kɛ videohi babauu kɛ fɔ Intanɛti ɔ nɔ kɛ ha Yehowa Odasefohi pe be ko nɛ be ɔ. Se ngɛ je ɔ mi hehi fuu ɔ, Intanɛti he jua wa, nɛ wa nyɛmimɛ ɔmɛ be nyɛe ma he. Ngɛ he komɛ hu ɔ, a gbeɔ kane kpamkpam, Intanɛti ɔ he sɔɛ, aloo Intanɛti be lejɛ ɔ kulaa.

Se amlɔ nɛ ɔ, wa nyɛmimɛ babauu nyɛɔ gblaa wa womi ɔmɛ kɛ video ɔmɛ ke a be Intanɛti po! Kɛ pee kɛɛ nɛ a nyɛɔ nɛ a peeɔ jã be mi nɛ a be Intanɛti ɔ?

A pee klama wayoo ko nɛ a tsɛɛ lɛ ke JW Box kɛ ha asafohi nɛ Intanɛti tsu we ní saminya ngɛ hehi nɛ a ngɛ ɔ. JW Box ɔ ji Intanɛti klama wayoo ko nɛ asafo ɔ he ngɛ kɔmpene ko dɛ, nɛ Computer Department nɛ ngɛ Betel ɔ ngɔ kɔmpiuta blɔ nɔ tomi ko kɛ fɔ nɔ, nɛ a ngɔ womihi kɛ videohi nɛ a ma nyɛ maa gbla hu kɛ fɔ nɔ. Kake he jua maa pee kaa U.S. Dɔla 75 aloo Ghana Sidi 430.

Nyɛmimɛ nyumuhi kɛ yihi nyɛɔ nɛ a kɔnɛtiɔ a fonhi aloo a tablɛtihi kɛ haa JW Box ɔ ngɛ Matsɛ Yemi Asa a nɔ nɛ a gblaa womihi kɛ videohi. Nihi nɛ a klama amɛ a se kɛ loo a klama amɛ yɛ hɛ mi tsɔ po nyɛɔ kɔnɛtiɔ. Se ke asafo ko be Intanɛti ɔ, kɛ a peeɔ kɛɛ nɛ a kɛ womi kɛ video ehehi nɛ baa a fɔɔ JW Box ɔ nɔ? Ke pee ɔ, asafo ɔ ní tsumi kɔni ɔ ngɔɔ níhi nɛ ngɛ jw.org nɔ nɛ a ma nyɛ maa ngɔ kɛ fɔ JW Box ɔ nɔ ɔ kɛ maneɔ mɛ ngɛ USB key loo pendrive nɔ. Lɔ ɔ he jua ji Dɔla 4 aloo maa pee Ghana Sidi 30.

Kɛ JW Box ɔ ye bua nyɛmimɛ ha kɛɛ? Nyɛminyumu Nathan Adruandra nɛ e ji fɔlɔ ngɛ Democratic Republic of Congo ɔ de ke: “I ka kaa ma gbla drama nɛ ji ‘Oo Yehowa, I Ngɔ Ye Hɛ Kɛ Fɔ O Nɔ’ kɛ Mo Kai Lɔt Yo ɔ. I pee hluu se e hí gblami, lɔ ɔ he ɔ, ye kɔni mi ba jɔ̃. Piɔ lɛɛ, i nyɛɔ nɛ i gblaa video nɛ ɔmɛ kɛ fɔɔ ye fon ɔ nɔ, nɛ e yeɔ bua wɔ fɔli ɔmɛ nɛ waa kɛ tsɔɔ wa bimɛ ní saminya.”

Nyɛminyumu ko nɛ e yeɔ bua asafohi nɛ a ngɛ Nigeria kɛ toɔ JW Box ɔ he blɔ nya ha mɛ ɔ de ke: “Nyɛmimɛ ɔmɛ naa JW Box ɔ kaa nike ní klɛdɛɛ ko nɛ je Yehowa ngɔ. A bua jɔ kaa amlɔ nɛ ɔ lɛɛ a ma nyɛ maa gbla womi ɔmɛ kɛ videohi nɛ a ji wa Ní Tsɔɔmi Ga Dade ɔmɛ nɛ dengme gbomi ko be mi.”

Wa ngɔ JW Box 1,700 kɛ se kɛ mane wa nyɛmimɛ nɛ a ngɛ Africa, Oceania, kɛ South America. Wa ngɛ blɔ nya toe konɛ waa ngɔ eko kɛ mane asafohi fuu. Jije wa naa sika ngɛ kɛ tsuɔ blɔ nya tomi nɛ ɔ he ní? Sika nɛ nyɛɛ kɛ fĩɔ je kɛ wɛ ní tsumi ɔ se, nɛ wa nine suɔ hiɛhiɛ nɔ kɛ guɔ donate.jw.org nɔ ɔ lɛ yeɔ buaa. Wa naa nyɛ si ngɛ nyɛ tsui mi nɛ nyɛ jeɔ kɛ yeɔ bua a he.