To kelo arem ki cwercwiny madwong. Meno aye tyen lok ma oweko Baibul lwongo to ni obedo lakwor. (1 Jo Korint 15:26) I Pwony me 27, ipwonyo ni Jehovah bityeko lakwor meno woko. Ento ngo ma timme i kom jo ma dong guto woko? I pwony man, ibinongo pwony mapol madok i kom cikke mukene mamwonya pa Jehovah. En ocikke ni ebidwoko cen dano bilion mapol wek gubed ki kwo maber pi naka. En bicerogi woko! Man tika twero timme ada? Tika kibicerogi me kwo i polo nyo i lobo kany?

1. Gin ango ma Jehovah mito timone pi jowa me amara ma dong guto woko?

Jehovah tye ki miti madwong adada me dwoko cen dano mapol ma dong guto woko wek gubed kwo odoco. Laco mo ma onongo tye ki niye ma nyinge Yubu obedo ki gen ni wi Lubanga pe biwil woko i kome ka eto. En owaco ki Lubanga ni: “Ka lacen ibilwonga, ci abigamo dogi [ki i bur lyel].”​—Kwan Yubu 14:13-15.

2. Wangeyo nining ni jo muto kitwero cerogi?

I kare ma onongo Yecu tye i lobo, Lubanga omine teko me cero jo muto. Yecu ocero latin anyaka mo ma onongo tye ki mwaka 12 ki wod pa dato mo bene. (Marako 5:41, 42; Luka 7:12-15) Lacen, Lajaro ma onongo tye larem Yecu oto woko. Kadi bed ni Lajaro onongo dong obedo i lyel pi nino angwen, Yecu ocere. I nge lega bot Lubanga, Yecu odange ki dwan malongo ni: “Lajaro, katti woko!” Ci, “En ma ceng oto-ni okatti woko.” (Jon 11:43, 44) Lajaro okatti woko ma kwo! Go kong yomcwiny ma jo gang pa Lajaro ki lureme gubedo kwede!

3. Gen ango ma tye pi joni me amara ma dong guto woko?

Baibul miniwa cikke ni: “Dano gibicer woko.” (Tic pa Lukwena 24:15) Jo ma Yecu ocero i kare ma en tye i lobo onongo pe gucito ka kwo i polo. (Jon 3:13) En ocerogi me medde ki kwo i lobo kany dok cwinygi obedo yom pi gin mutimme meno. I yo acel-lu, cokcok-ki Yecu bicero dano bilion mapol me bedo ki kwo maber i paradic i lobo kany. En owaco ni jo ma wi Lubanga po i komgi kibicerogi, kadi bed ni pe tye dano mo ma wiye po i komgi ni gukwo i lobo kany.​—Jon 5:28, 29.

 NONG NGEC MATUT

4. Yecu dong onyuto ni etwero cero jo muto

Nong ngec matut i kom gin ma Yecu otimo pi lareme Lajaro. Kwan Jon 11:14, 38-44, ci wunyam lapeny magi:

• Wangeyo nining ni Lajaro ada onongo oto woko?​—Nen tyeng me 39.

• Ka onongo tye ada ni Lajaro ocito i polo, tika itamo ni cero Lajaro onongo obedo gin maber bote?

Tuk VIDIO.

5. Jo mapol kibicerogi!

Kwan Jabuli 37:29, ci wunyam lapeny man:

• Dano bilion mapol ma kibicerogi gibikwo kwene?

Yecu bicero jo mapol, kadi wa jo ma onongo pe giworo Jehovah. Kwan Tic pa Lukwena 24:15, ci wunyam lapeny man:

• Anga ma imito neno ka kicero?

• Gen me nicer okweyo dok ocuko cwiny lunyodo pa Phelicity nining?

 WOT WIYE WIYE

Baibul miniwa gen ni dano bilion mapol ma guto kibicerogi. Jehovah mito ni gukwo odoco, dok en omiyo ki Yecu teko me cerogi.

Ngo ma ipwonyo?

• Wangeyo nining ni Jehovah ki Yecu gitye ki miti madwong me cero jo muto?

• Dano bilion mapol ma kibicerogi gibikwo kwene​—i polo nyo i lobo kany? Pingo iwaco kit meno?

• Gin ango ma miyo imoko ni joni me amara gibikwo doki?