EVBỌZẸE NE Ọ NA RU EKPATAKI: E Zẹkaraia keghi tae yotọ wẹẹ, emwa ni ke agbẹnvbo ughughan rre gha miẹn iyẹn nọ maan yi. (Zẹk 8:23) Sokpan de ọmwa nọ khian kporhu iyẹn nọ maan na, ma iran? (Rom 10:13-15) Ọ keghi re iwinna nọ bi ye ima egbe ne ima ya kporhu ma emwa hia ni rre ẹdogbo ne ima na kporhu.—od 84 okhuẹn 10-11.

VBENE A YA RUẸ HẸ:

• Mu egbe yotọ. Uwẹ zẹdia dekun emwa ni zẹ urhuẹvbo ọvbehe vbe ako ne u na kporhu ra? U gha sẹtin loo JW Language app ya mu egbe ẹre yotọ, ẹmwẹ ne u khian ta ya kporhu ma ọmwa nọ zẹ urhuẹvbo ọvbehe. U sẹtin vbe loo efoni ruẹ, ya rhie ọ yan owa ekhọe ghee ayahọmwaehọ eso na ya urhuẹvbo ọghẹe gbẹn vbe jw.org

• Gha gbaro kọtọ. Vbe u gha rre ikporhu ọghe ke owa ya sẹ owa, ghẹ rhie aro gberra ẹkpotọ nọ rhirhi kie nuẹ, ne u ya kporhu ma avbe ilavbodẹ kevbe emwa ni khẹ okotọ. Adeghẹ u na gha rre ikporhu ọghe adesẹ orere, ghẹ mianmian emwi ne u gu rre evba

• Ghẹ gi egbe wọọ ruẹ. Adeghẹ u ma miẹn emwa eso vbe owa, ghẹ gi egbe iran wọọ ruẹ. Hia ne u kporhu vbe owa hia ni rre ẹdogbo ne u na kporhu. Adeghẹ u ma miẹn iran vbe owa vbe owiẹ, u sẹtin dọlegbe sẹ evba vbe ẹghẹ avan ra ẹghẹ ota ra u sẹtin yo vbe ẹdẹ ọvbehe. U sẹtin vbe ya elẹta ra efoni kporhu ma emwa ne u ma miẹn vbe owa. U sẹtin vbe dekun egbe emwa vberriọ vbe ikporhu ọghe idunmwu

• Rhie obọ lelẹe. Adeghẹ u na miẹn ọmwa nọ mwẹ ẹkorhiẹnrhiẹnmwẹ, ghẹ gi ẹre kpẹẹ gbe, u ke dọlegbe mu otuẹ gie ẹre. Adeghẹ nene ọmwa na gha zẹ urhuẹvbo ọvbehe, gualọ ọmwa nọ zẹ urhuẹvbo ọghẹe nọ rhie obọ lelẹe. Sokpan, u ye gha yo, a te miẹn wẹẹ ọmwa ne ọ zẹ urhuẹvbo ọghẹe sẹ evba.—od 94 okhuẹn 39-40

VBE A GHA GHI GHEE ẸRE FO NẸ IGHẸ NE VIDIO KPORHU IYẸN NỌ MAAN YA SẸ “EHE NE AGBỌN SẸ,” U GHI ZẸ EWANNIẸN YE AVBE INỌTA NA:

• De emwamwa ne etẹn eso ru, ne iran mieke na sẹtin kporhu ma emwa ni rre eke nọ rree ẹsẹsẹmwẹse? (1 Kọr 9:​22, 23)

• De isievẹn eso ne iran la gberra?

• De afiangbe eso ne iran miẹn?

• De emwi eso ne u gha sẹtin ru, ne iwinna ikporhu iyẹn nọ maan ọghuẹ mieke na da otọ, vbe ẹdogbo ne u na kporhu?