Jesu kevbe avbe ukọ ọghẹe keghi la Iya ọghe Kidrọn gha rrie Oke Oliv. Vbe ẹdẹ khian ghi gbe vbe uki ko urho nẹ, iran keghi sẹ ogba ọghe Gẹtsemani. Jesu keghi tama avbe ukọ ọghẹe wẹẹ: “Wa mudia mwa, ne uwa gu mwẹ gha ba odẹ.” Vbe Jesu ghi sikẹ odaro vbuwe ogba nii, ọ na de diguẹ. Ọ keghi ya obalọ na erhunmwu gie Jehova wẹẹ: ‘Gi ahoo ọghuẹ sẹ.’ Ẹre Jehova na ghi gie odibo ọkpa rre, ne ọ do rhie igiọdu ne Jesu. Vbe Jesu ghi werriegbe bu avbe ukọ ọghẹe, ọ na do bẹghe ẹre wẹẹ iran eha vbiẹ. Ọ keghi tama iran wẹẹ: ‘Wa kpaegbe! Ọna i re ẹghẹ na ya vbiẹ! Ẹghẹ ne obọ eghian mwẹ khian ya vba mwẹ, ẹre na khin.’

Vbe ọ ma he kpẹẹ vba, e Judas kevbe ẹbu emwa ni viọ agbada mwẹ obọ kevbe ni da ukpokpo yi, keghi la uwu ogba nii. E Judas rẹnrẹn wẹẹ, irẹn gha miẹn Jesu vbe ogba nii, rhunmwuda ọ ka gha lelẹe yo evba. E Judas vbe tama ivbiyokuo ni lelẹe rre wẹẹ, irẹn gha gie Jesu ma iran. Iran ghi sẹ evba, e Judas keghi khian bu Jesu. Ọ na tama rẹn wẹẹ: ‘Ọmamwaemwi, ọfunmwegbe gu ruẹ rrọọ.’ Vbe iyeke ọni, e Judas keghi mu unu soso ẹre. Jesu na ghi tama rẹn wẹẹ: ‘Larre Judas, te uwẹ mu unu soso imẹ, ne u ya khiẹn mwẹ ra?’

Jesu keghi zẹ owẹ bu ẹbu emwa ni rre, ọ na nọ iran wẹẹ: “De ọmwa ne uwa gualọ yi?” Iran keghi wanniẹn ọnrẹn wẹẹ: “Jesu ne Ovbi e Nazarẹt.” Vbe Jesu ghi tama iran wẹẹ: ‘Mẹ nọ,’ egbe na wa wọọ iran. Jesu na werriegbe nọ iran wẹẹ: “De ọmwa ne uwa gualọ yi?” Iran na werriegbe wanniẹn wẹẹ: “Jesu ne Ovbi e Nazarẹt.” Ẹre Jesu na ghi wẹẹ: ‘Mẹ ma ka tama uwa wẹẹ imẹ nọ? Wa mu mwẹ, ne uwa sẹ iran nikẹre rae.’

Vbe Pita ghi bẹghe emwi nọ sunu, ọ na yuo umozo ọghẹe ladian, ọ na ya fian ehọ ọguọmwadia ogiohẹn ọkpa na tie ẹre Malkọs fua. Sokpan Jesu keghi werriegbe sikan ehọ ọghẹe yọ. Ọ na ghi tama e Pita wẹẹ: ‘Rhie umozo ruẹ ye ako ọghẹe. Ọmwa ne ọ ya umozo gbe ọmwa rua,  umozo ẹre a vbe ya gbe ẹre rua.’ Ẹre ivbiyokuo nii na ghi mu Jesu, iran na gbalọ ọre obọ. Avbe ukọ ọghe Jesu keghi lẹẹ fua. Iran keghi mu Jesu gha rrie owa Anas, ne ogie ohẹn. Vbe iran ghi sẹ evba, Anas na gha zọlọ Jesu ọta. Vbe ọ ghi nọ rẹn ọta fo nẹ, ọ na wẹẹ ne iran mu Jesu gha rrie ọghe Kaiafas ne Ogie Ohẹn. Sokpan de emwi nọ ghi sunu daa avbe ukọ ọghe Jesu?