Vbe Jesu ghi zẹ ukọ ne 12 nẹ, ọ na ke uhunmwu oke tuorre gha die ehe ne emwa na gbẹbu. E Galili, e Judia, e Taia, e Saidọn, e Siria kevbe ẹvbo ni rre Jọdan ẹre iran na ke rre. Iran keghi viọ emwa ni khuọnmwi emianmwẹ ughughan kevbe emwa ne orhiọn dan loo bu e Jesu gha dee. Jesu keghi mu iran hia egbe rran. Jesu keghi tota ye ọkpẹn oke gha gu iran guan. Ọ keghi rhan otọ emwi ne a gha ru, na mieke na gha re ọse ọghe Osanobua. Ọ khẹke ne ima rẹn wẹẹ ima gualọ adia ọghe Jehova, ọ vbe khẹke ne ima hoẹmwẹ ọnrẹn. Sokpan ma i sẹtin hoẹmwẹ Osanobua deghẹ ima ma na hoẹmwẹ emwa ọvbehe. Ọ khẹke ne ima gha ya obọ esi mu emwa hia, uhiẹn ya sẹ egbe eghian ima.

Jesu keghi tama iran wẹẹ: ‘Ẹi re ọse ruẹ ọkpa ẹre u khian hoẹmwẹ ọnrẹn. Te ọ khẹke ne u vbe hoẹmwẹ eghian ruẹ kevbe ne u ya ekhọe hia yabọ iran. Adeghẹ ọmwa na gha mu ohu ruẹ, u ghi ya rinmwiaẹn vbobọvbobọ, ne ọ yabọ ruẹ. Gha ya obọ esi mu emwa ọvbehe vbene u hoo ne iran vbe ya ye obọ esi mu ruẹ.’

 Jesu vbe rhie ibude ne iran vbe nọ dekaan aro nọ khẹke na ya gha ghee emwi ewe. Ọ khare wẹẹ: ‘Na gha re ọse ọghe Jehova ẹre ọ maan sẹ na gha mwẹ igho. Oyi sẹtin do ruẹ igho mu, sokpan ọmwa rhọkpa i sẹtin do ẹre mu ighẹ asikẹgbe ne u gu e Jehova mwẹ. Ghẹ ghi kpokpo egbe ba ẹmwẹ evba gha re, evba gha da, ra ukpọn na gha yọ. U ma bẹghe avbe ahianmwẹ ni rre orere iso? Ẹghẹ hia ẹre Osanobua ya kpemehe emwi ne iran gha re ne iran. Osi na si i khian rhie ẹdẹ ba ruẹ ẹdẹ. Yerre wẹẹ, e Jehova rẹn emwi ne u gualọ.’

Emwa ni gbẹbu na yan unu ruan rhunmwuda iran ma he miẹn ọmwa nọ guan vbe na ghee Jesu ẹdẹ. Emwa ni su vbe ugamwẹ ma he maa iran egbe emwi vbenia ẹdẹ. Vbọsiẹ ne Jesu na gha re ọmamwaemwi nọkhua? Rhunmwuda, emwi hia ne irẹn maa emwa re keghi re nọ ke obọ e Jehova rre.