Na sẹtin kpemehe evba gha re evba gha da ne ẹgbẹe ọghomwa, te a gha loo igho. (Itan 30:8) ‘Ugue ẹre igho khin’ amaiwẹ. (Asan-Ibo 7:12) Zẹvbe ọdọ vbe amwẹ, ọ sẹtin gha re emwi nọ lọghọ na gha ziro ye ẹmwẹ igho, sokpan ghẹ gie ẹmwẹ igho si ẹzọ ne uwa. (Ẹfisọs 4:32) Vbe nọ dekaan vbene a khian ya loo igho hẹ, ọ khẹke ne ọdọ vbe amwẹ gba ẹko egbe kevbe ne iran gha mwẹ akugbe.

EMWI NE BAIBOL KHARE: “Deghẹ ọkpa vbe uwu uwa ra bọ owa, ọ ghi tota ka roro igho ne ọ gha gbe nẹ, ne ọ miẹn ehe na rẹn a deghẹ irẹn mwẹ igho ne ọ gha gba ẹre.” (Luk 14:28) Ọ keghi re emwi ne kpataki deghẹ uwa na gha ziro ẹre kugbe vbene uwa khian ya gha loo igho hẹ. (Emọs 3:3) Roro emwi ne u khian dẹ, ne u mieke na rẹn inu igho ne u gha sẹtin hae. (Itan 31:16) Ghẹ wa gha dẹlẹ emwi vbene u rhirhi miẹn rhunmwuda wẹẹ u mwẹ igho. Hia ne u ghẹ ru osa. Ghẹ loo gberra igho ne u mwẹ.—Itan 21:5; 22:7.

EMWI NE U GHA SẸTIN RU:

• Uwa gha loo igho kẹrre vbe uki gha gba, uwa koko ziro yan emwi ne uwa khian yae ru

• Adeghẹ a na miẹn wẹẹ igho ne uwa loo ro ẹre ọ kpọlọ sẹ ne uwa miẹn vbe uki, uwa ghi ru emwamwa ne uwa ya fiaẹn kanmwa emwi ne uwa loo igho yi. Vbe igiemwi, uwa sẹtin gha le evbare obọ uwa, ne uwa gha te ya gha dẹ vbe orere

EMWI NE BAIBOL KHARE: ‘Ya ẹkoata gha ru emwi hia, ẹi re vbe odaro e Jehova ọkpa, sokpan vbe odaro emwa nagbọn.’ (2 Kọrinti 8:21) Gie ọmwa ne uwa gba rrọọ vbe orọnmwẹ rẹn igho ne u gele miẹn kevbe ne u gele loo.

U ke ru atamuolọyan nọ khua vbe nọ dekaan vbene u khian ya loo igho hẹ, ka gha gu ọmwa ne uwa gba rrọọ vbe orọnmwẹ ziro ẹre nẹ. (Itan 13:10) Adeghẹ uwa na koko gha ziro vbe nọ dekaan vbene a gha loo igho hẹ, ọ gha ye ọfunmwegbe gha rre orọnmwẹ uwa. Gha ghee igho ne u miẹn zẹvbe ọghe ẹgbẹe ruẹ, ẹi re zẹvbe ọghe obọ ruẹ.—1 Timoti 5:8.

EMWI NE U GHA SẸTIN RU:

• Uwa koko tae yotọ inu igho ne dọmwadọghẹ gha sẹtin ya ekhọe obọ re loo

• Ghẹ ziengbe ne ọlọghọmwa ka rre nẹ, uwa ke gha ta ẹmwẹ igho