1 Timoteo 6:1-21
6 Akʼo yichʼik lek ta mukʼ yajvalik li buchʼutik oyik ta mosoile sventa mu chopoluk xichʼ albel skʼoplal li sbi Diose xchiʼuk li chanubtasele.
2 Jech xtok li buchʼutik jchʼunolajel yajvalike akʼo yichʼik lek ta mukʼ, yuʼun jaʼik ermanoetik. Mas me baxbolikuk chtunik ta stojolalik, yuʼun li buchʼutik tstabe sbalil li slekil abtelik li mosoiletike jaʼik jchʼunolajeletik xchiʼuk jaʼik li buchʼutik kʼanbilike.
Jech-o me xavakʼ ta chanel li kʼusitik taje xchiʼuk jech-o me xaval li mantaletike.
3 Mi oy junuk vinik ti yan-o kʼusi chchanubtasvane, ti muʼyuk bu jech kʼuchaʼal li lekil chanubtasel ti jaʼ yuʼun li Kajvaltik Jesukristoe xchiʼuk ti mu jechuk kʼuchaʼal li chanubtasel ta sventa li yichʼel ta mukʼ Diose,
4 xtoyet xa tajek chaʼi sba xchiʼuk mu xaʼibe smelolal jsetʼuk. Jaʼ oy tajek ta yoʼonton ti tsvul sbaike xchiʼuk ti chut sbaik ta sventa li kʼusi chalike. Skotol li kʼusitik taje jaʼ tslikes itʼixal, tsakbail ta kʼop, chopol loʼiltavanej, muʼyuk xa spatoj yoʼontonik ta jujuntal,
5 jech-o tsvulilan sbaik ta sventa li kʼusitik jutuk noʼox tsots skʼoplal xchiʼuk li viniketik ti sokem snopbenike xchiʼuk ti mu xaʼibeik smelolal li kʼusi melele, ti tsnopik ti jaʼ sventa pasob kanal li yichʼel ta mukʼ Diose.*
6 Ta melel ep ta jpastik kanal li ta yichʼel ta mukʼ Dios mi jun noʼox koʼontontik yuʼun ti kʼu yepal oy kuʼuntike.
7 Yuʼun muʼyuk kʼusi chkichʼtik tal jsetʼuk kʼalal chijvokʼ* liʼ ta balumile xchiʼuk muʼyuk kʼusi chkichʼtik batel jsetʼuk kʼalal chijchame.
8 Jaʼ yuʼun, mi oy noʼox jveʼeltik xchiʼuk jkʼuʼ jpokʼtike, junuk noʼox koʼontontik yuʼun li kʼusitik taje.
9 Pe chyal ta preva li buchʼutik oy ta yoʼonton tskʼan tspasik ta jkʼuleje, chyakatik ta petsʼ xchiʼuk chlik skʼan ta yoʼontonik li kʼusitik chopole xchiʼuk ti chakʼ vokolile, ti jaʼ chlajesatik-o xchiʼuk ti tsokesatik-o li viniketike.
10 Yuʼun li skʼanel takʼine jaʼ yibel skotol li kʼusitik tsokesvane, yuʼun li buchʼutik batem ta yoʼontonik skʼanel li kʼusitik taje, oy namajemik xa ta sventa li xchʼunel oʼontonale xchiʼuk ep tajek staoj svokolik ti toj kʼuxe.*
11 Akʼo mi jech, li voʼot yajtunelot Diose jatavan me lokʼel ta stojolal li kʼusitik taje. Jaʼ akʼbo batel yipal saʼel li kʼusitik tukʼe,* li yichʼel ta mukʼ Diose, li xchʼunel oʼontonale, li kʼanelale, ti stsʼik avuʼune xchiʼuk ti manxoukote.
12 Paso-o me batel li paskʼop ti lek tajeke, ti jaʼ ta sventa li xchʼunel oʼontonale; tsako me lek li kuxlejal sbatel osil ti jaʼ sventa laj avichʼ takel ta ikʼele xchiʼuk ti lek jamal laj avakʼ ta aʼiel ta skotol krixchanoetik ta yeloval epal testigoetike.
13 Ta sat li Dios ti jaʼ li buchʼu kuxul chikta skotol li kʼusitike xchiʼuk ta sat Kristo Jesus ti kʼot kʼuchaʼal testigo ti lek jamal laj yakʼ ta aʼiel ta stojolal li Ponsio Pilatoe, chkalbot mantal
14 ti muʼyukuk yikʼobal xchiʼuk ti lekuk skʼoplal ti kʼu yelan chachʼun li mantaletike, jech-o me xapas jaʼ to mi vinaj li Kajvaltik Jesukristoe,
15 li svinajeb buchʼu xmuyubaj* xchiʼuk li Buchʼu stuk noʼox oy sjuʼele, chakʼ sba ta ilel mi tsʼaki li yorail akʼbile, li stuke jaʼ Ajvalil yuʼun li buchʼutik ch-ajvalilajike xchiʼuk jaʼ Kajvaltik yuʼun li buchʼutik ch-ajvalilajik kʼuchaʼal ajvaliletike,
16 ti jaʼ noʼox stuk ti mu snaʼ xchame, ti te nakal ta lus ti muʼyuk buchʼu xuʼ x-oche, mi junuk krixchano yiloj xchiʼuk muʼyuk buchʼu xuʼ xil. Akʼo yichʼ ichʼel ta mukʼ xchiʼuk jaʼ oy sjuʼel sbatel osil. Jechuk.
17 Albo mantal li buchʼutik jkʼulejetik ta skotol li kʼusitik oy ta balumil avie* ti mu me xtoyetuk xa chaʼi sbaike, ti maʼukuk me te spat yoʼontonik ta kʼulejal ti muʼyuk sbalile, jaʼ te akʼo spat yoʼontonik ta stojolal li Dios ti ep tajek chakʼbutik li kʼusitik ta jkʼupintike.
18 Alanbo yaʼiik ti akʼo yabtelanik li kʼusi leke, ti jkʼulejikuk ta spasel li lekil abtelale, ti lekuk yoʼontonike, ti mu sjalanbeik li yantike,
19 mi jech tspasike chakʼbeik lek snakleb ta sventa li kʼusi tstaik ta jelavel ti xkoʼolaj kʼuchaʼal kʼulejale, sventa xuʼ tstsak lek yuʼunik li batsʼi mero kuxlejale.
20 Jkʼanbil Timoteo, chabio me lek li kʼusi la-akʼbat abaine, chʼako me aba ta stojolal li loʼiletik ti muʼyuk sbalil ti jaʼ noʼox tsokesbe skʼoplal li kʼusi chʼule xchiʼuk chʼako aba ta stojolal li jecheʼ yojtikinobil ti jaʼ te chlik tal li kʼusi tskontrain li kʼusi melele.
21 Ta skoj ti xtoyetik xa chakʼik ta ilel li yojtikinobil taje, oy junantik ti laj xa yiktaik li xchʼunel oʼontonale.
Teuk me oy ta atojolalik li slekil yutsil oʼontonale.
Tsʼibetik ta yok vun
^ Kʼelo glosario.
^ O: «chij-ayan».
^ O: «jomochʼtik oyik ta skoj svokolik».
^ Kʼelo glosario.
^ O: «pʼij yoʼn»; «nichim yoʼonton».
^ Kʼelo glosario.
